ភ្នំពេញ: រថយន្តម៉ាកឡិចស៊ីស RX300 មួយគ្រឿង បើកលឿន ជ្រុលបុកខឿនសួនច្បារចែកផ្លូវ រួចបន្តហោះទៅប៉ះនឹងបង្គោលស្លាកប៉ាន់ណូ១ដើមទៀត បណ្តាលឲ្យខូចខាត ចំណែករថយន្តដាច់ក្រឡេកង់មួយចំហៀង កល់ជាប់លើសួនច្បារ ទៅមុខលែងរួច។

ហេតុការណ៍នេះបានកើតឡើងកាលពីវេលាម៉ោង១១ និង៥៥ នាទីយប់ ថ្ងៃទី៥ ខែឧសភា ឆ្នាំ២០១៧ ស្ថិតតាមបណ្តោយផ្លូវជាតិលេខ៦អា ក្នុងសង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ។

យោងតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេបានឃើញ រថយន្តឡិចស៊ីស RX300 ពណ៌ស្ករ មួយគ្រឿង ពាក់ស្លាកលេខ ភ្នំពេញ 2P-9539 បើកបរដោយបុរសម្នាក់និងរួមដំណើរជាមួយមនុស្ស៣នាក់ទៀត បានធ្វើដំណើរយ៉ាងលឿន តាមបណ្តោយផ្លូវជាតិលេខ ៦អា ក្នុងទិសដៅពីត្បូងទៅជើង លុះមកដល់ស្រាប់តែពេលនោះក៏រថយន្តឡិចស៊ីសនេះរេចង្កួតជ្រុលមកបុកនិងខឿនសួនច្បារចែកទ្រូងផ្លូវបណ្តាលឲ្យរថយន្តហោះឡើងទៅប៉ះនឹងបង្គោលស្លាកប៉ាន់ណូដើមទៀតពេញទំហឹង ធ្វើឲ្យរថយន្តបង្ក រងការខូចខាតដាច់ក្រឡេកង់ ផ្នែកខាងឆ្វេង ហើយកល់ជាប់នៅលើសួនច្បារទៅមុខលែងរួចតែម្តង។

ចំណែកប្រភពមួយទៀតបានឲ្យដឹងថា មុនដំបូងគេឃើញរថយន្តឡិចស៊ីសRX300ខាងលើ បានបែកកង់ ហើយក៏រេចង្កូតជ្រុលបុកខឿនសួនច្បារចែកទ្រូងនិង បង្គោល ស្លាកប៉ាន់ណូ បែបនេះតែម្តង និងបានបណ្តាលឲ្យមនុស្សម្នាក់រងរបួសផងដែរ។

ក្រោយកើតហេតុរថយន្តបង្កខាងលើ ត្រូវបានសមត្ថកិច្ចជំនាញធ្វើការវាស់វែងយកទៅរក្សាទុកនៅការិយាល័យចរាចរណ៍ជើងគោកនៃស្នងការដ្ឋាននគរបាលរាជធានីភ្នំពេញ ដើម្បីរង់ចាំម្ចាស់ចូលខ្លួនមកដោះស្រាយគ្នានៅពេលក្រោយតាមនីតិវិធីច្បាប់ ៕