កំពង់ស្ពឺ: លោក តាប់ លន ស្នងការរងផែនសណ្តាប់ធ្នាប់ បានប្រាប់ Post News ថា មានករណីគ្រោះថ្នាក់ចរាចរណ៍រវាងរថយន្ដបុកម៉ូតូដែលធ្វើដំណើរបញ្ច្រសទិសគ្នា បណ្តាលឲ្យយុវជនម្នាក់ស្លាប់នៅនឹងកន្លែង និងម្នាក់ទៀតរបួសស្រាល។

ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង២និង៥នាទី រសៀលថ្ងែទី៧ ខែឧសភា ឆ្នាំ២០១៧ នៅលើផ្លូវជាតិលេខ៤៤គីឡូម៉ែតលេខ១-២ នៅក្នុងភូមិថ្មី សង្កាត់រកាធំ ក្រុងច្បារមន ខេត្ដកំពង់ស្ពឺ។

លោក តាប់ លន បានបន្តថា ជនរងគ្រោះមានឈ្មោះ ហេង វាសនា ភេទប្រុស អាយុ១៧ឆ្នាំ រស់នៅភូមិត្រពាំងគិន ឃុំព្នាយ ស្រុកសំរោងទង កំពង់ស្ពឺ ស្លាប់នៅនឹងកន្លែង និងអ្នករួមដំណើរឈ្មោះ ផុន ណារាជ ភេទប្រុស អាយុ២៩ឆ្នាំ នៅភូមិសង្កែជ្រុំ ឃុំខ្ទុងក្រាំង ស្រុកសំរោងទង់ កំពង់ស្ពឺ របួសស្រាល។

លោកបានបន្តទៀតថា មុនពេលកើតហេតុ គេឃើញ រថយន្ដមិនចាំម៉ាកពាក់ស្លាកលេខ 3A-3276 បើកបរពីទិសខាងជើង ចំណែកម៉ូតូជិះពីទិសខាងត្បូង ម៉ាក វីវ៉ា ពណ៌ខ្មៅពាក់ស្លាកលេខ ភ្នំពេញ1AB-8406 លុះមកដល់កន្លែងកើតហេតុ បានបុកនឹងម៉ូតូពេញទំហឹង បណ្តាលឲ្យយុវជនម្នាក់ស្លាប់ភ្លាមៗនៅនឹងកន្លែង និងម្នាក់ទៀតរបួសស្រាល។ ចំណែករថយន្តបង្កបានបើករត់គេចខ្លួនបាត់ស្រមោល។

ក្រោយពីកើតហេតុ សមត្ថកិច្ចបានចុះទៅដល់កន្លែងហេតុ ធ្វើកំណត់ហេតុ និងនាំយកម៉ូតូមករក្សាទុករង ចំណែកសាកសព ត្រូវបានសមត្ថកិច្ចប្រគល់ជូនក្រុមគ្រួសារយកទៅធ្វើបុណ្យតាមប្រពៃណី៕