ភ្នំពេញៈ ជនសង្ស័យម្នាក់ជាមុខសញ្ញាឆក់កាបូបយ៉ាងសកម្មក្នុងរាជធានីភ្នំពេញ ត្រូវបានសមត្ថកិច្ចខណ្ឌឫស្សីកែវ ធ្វើការឃាត់ខ្លួនជាក់ស្តែង ក្រោយពីជនសង្ស័យរូបនេះឆក់កាបូបមិនបានសម្រេច។

ហេតុការណ៍ឃាត់ខ្លួននេះបានកើតឡើងកាលពីវេលាម៉ោង១០និង៣០នាទីព្រឹក ថ្ងៃទី៩ ខែឧសភា ឆ្នាំ២០១៧ ស្ថិតនៅតាមបណ្ដោយផ្លូវជាតិលេខ៥ ត្រង់ចំណុចមុខរោងចក្រទឹកដោះគោ ភូមិផ្សារតូច សង្កាត់ទួលសង្កែ ខណ្ឌឫស្សីកែវ រាជធានីភ្នំពេញ។

សមត្ថកិច្ចបានឲ្យដឹងថា ជនរងគ្រោះមានឈ្មោះ លត ណារុំ ភេទស្រី អាយុ ៣៤ឆ្នាំ មុខរបរនៅផ្ទះ ស្នាក់នៅផ្ទះលេខ៩០ ភូមិមិត្តភាព ក្រុម៧ សង្កាត់ឫស្សីកែវ ខណ្ឌឫស្សីកែវ។ ចំណែកឯជនសង្ស័យមានឈ្មោះ ឧត្តម ដាវីត ហៅវីត ភេទប្រុស អាយុ ១៨ឆ្នាំ មុខរបរ មិនពិតប្រាកដ ស្នាក់នៅបន្ទាប់ជួល ខាងក្រោយប៉ុស្តិ៍នគរបាលបឹងកក់១ សង្កាត់បឹងកក់១ ខណ្ឌទួលគោក។

សមត្ថកិច្ចបានបន្តទៀតថា មុនពេលកើតហេតុ គេឃើញជនរងគ្រោះជិះម៉ូតូ មួយគ្រឿង ម៉ាក Today ពណ៌ស ពាក់ស្លាកលេខ ភ្នំពេញ 1DE-7109 តែម្នាក់ឯង ដោយជិះចេញពីផ្ទះ ដើម្បីទៅយកកូនពីសាលារៀន ក្រោយពីជិះចេញពីយកកូននៅសាលារៀនរួចហើយ ជនរងគ្រោះក៏បានជិះម៉ូតូត្រឡប់ទៅផ្ទះវិញ ដោយជិះក្នុងទិសដៅពីជើងទៅត្បូងតាមបណ្តោយផ្លូវជាតិលេខ៥ ខណៈជិះមកដល់ចណុចកើតហេតុខាងលើ ស្រាប់តែលេចមុខជនសង្ស័យម្នាក់ ជិះម៉ូតូ មួយគ្រឿង ម៉ាក ហុងដាឌ្រីមសង់ សេ១២៥ ស៊េរី២០១៧ ពណ៌ខ្មៅ មិនមានស្លាកលេខ មកពីក្រោយបានធ្វើសកម្មភាពឆក់កាបូប ដោយពេលធ្វើសកម្មឆក់នោះ ជនសង្ស័យបានទាក់ដៃចង្កូតម៉ូតូជាមួយជនរងគ្រោះ។ ភ្លាមៗនោះ ជនរងគ្រោះបានស្រែកផ្អើលឆាឡោ ខណៈនោះ ក៏ត្រូវសមត្ថកិច្ចខណ្ឌ និងប៉ុស្តិ៍ទួលសង្កែជួយអន្តរាគមន៍ឃាត់ខ្លួនបានតែម្តង។

ក្រោយពីសមត្ថកិច្ចឃាត់ខ្លួន និងសាកសួរជនសង្ស័យខាងលើរួចមក ជនសង្ស័យបានសារភាពថា រូបគេបានធ្វើសកម្មភាពឆក់កាបូបចំនួន ៦ករណី ដោយករណីទី១ នៅថ្ងៃទី០៥ ខែឧសភា ឆ្នាំ២០១៧ វេលាម៉ោង ៩និង៤០នាទីព្រឹក ឆក់កាបូបនៅចំណុចកែងសាលា ហ្សាមែន ខណ្ឌទួលគោក, ករណីទី២ នៅថ្ងៃទី០៦ ខែឧសភា ឆ្នាំ២០១៧ វេលាម៉ោង ៩និង៣០នាទីព្រឹក ឆក់កាបូបនៅចំណុចផ្សារមាន់អាំង, ករណីទី៣ នៅថ្ងៃទី០៧ ខែឧសភា ឆ្នាំ២០១៧ វេលាម៉ោង ៩និង២០នាទីព្រឹក ឆក់កាបូបនៅមុខចំណុចសាលាបឋមសិក្សា ទួលគោក, ករណីទី៤ នៅថ្ងៃទី០៨ ខែឧសភា ឆ្នាំ២០១៧ វេលាម៉ោង ៩ព្រឹក ឆក់កាបូបនៅចំណុចរង្វង់មូលទួលគោក, ករណីទី៥ នៅថ្ងៃទី០៩ ខែឧសភា ឆ្នាំ២០១៧ វេលាម៉ោង ៩និង៣០នាទីព្រឹក ឆក់កាបូបនៅចំណុចមុខផ្ទះសំណាក់យឺហោ សេរីធំ សង្កាត់ទួលសង្កែ និងករណីទី៦ នៅថ្ងៃទី០៩ ខែឧសភា ឆ្នាំ២០១៧ វេលាម៉ោង ១០និង៣០នាទីយប់ ឆក់កាបូបនៅចំណុចមុខសាលា ប៊ែលធី អន្តរជាតិ សង្កាត់ទួលសង្កែ។

បច្ចុប្បន្នជនសង្ស័យខាងលើ រួមជាមួយនឹងវត្ថុតាង ត្រូវសមត្ថកិច្ចបញ្ជូនខ្លួនទៅឃុំជាបណ្តោះអាសន្ននៅអធិការដ្ឋាននគរបាលខណ្ឌឫស្សីកែវ ដើម្បីកសាងសំណុំចាត់ការបន្តតាមនីតិវិធីច្បាប់៕