កណ្តាល: ហេតុការណ៍ភ្ញាក់ផ្អើលមួយបានកើតឡើង បន្ទាប់ពីបុរសម្នាក់រួមនឹងបុរស២នាក់ទៀត ត្រូវបានថៅកែជនជាតិថៃ ប្រើឲ្យទៅយកប្រហិតដែលដាក់នៅក្នុងទូលើរថយន្តដែលមានភ្ជាប់ចរន្តអគ្គិសនី បណ្តាលឲ្យឆក់ស្លាប់ម្នាក់ភ្លាមៗយ៉ាងអាណោចអាធ័ម ខណ:ដែលគេកំពុងប្រគុំConcert ស្រាបៀរលីអូ។

ហេតុការណ៍នេះបានកើតឡើងកាលពីវេលាម៉ោង១០ និង៣៥នាទី យប់ថ្ងៃទី៩ ខែឧសភា ឆ្នាំ២០១៧ ស្ថិតនៅចំណុចបរវិវេណការប្រគុំ Concert ស្រាបៀរលីអូ ដែលមានទីតាំងក្នុងភូមិ២ សង្កាត់តាខ្មៅ ក្រុងតាខ្មៅ ខេត្តកណ្តាល។

ជនរងគ្រោះដែលស្លាប់ខាងលើនេះ មានឈ្មោះ ម៉ោល ទូច ភេទប្រុស អាយុ៣៨ឆ្នាំ ស្នាក់នៅក្នុងក្រុងបាត់ដំបង ខេត្តបាត់ដំបង។

ប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុ ខណ:ដែលគេកំពុងប្រគុំConcertស្រាបៀរលីអូនោះ ថៅកែជនជាតិថៃ បានប្រើជនរងគ្រោះរួមនឹងមនុស្ស២នាក់ទៀត ក្នុងនោះមានកូនថៅកែជនជាតិថៃម្នាក់ និងបុគ្គលិកម្នាក់ទៀត ឲ្យទៅយកប្រហិតដែលគាត់បានដាក់នៅក្នុងធុងក្លាស្សេ ដែលទុកនៅលើរថយន្តមានភ្ជាប់ចរន្តអគ្គិសនី ខណ:នោះស្រាប់តែឆ្លងចរន្តអគ្គិសនីឆក់ជនរងគ្រោះបណ្តាលឲ្យស្លាប់ភ្លាមៗនៅនឹងកន្លែង បង្កឲ្យមានការភ្ញាក់ផ្អើលដល់បងប្អូនប្រជាពលរដ្ឋ រួមនឹងសមត្ថកិច្ចនគរបាលមូលដ្ឋាន ចុះមកអន្តរាគមន៍ភ្លាមៗផងដែរ៕