ភ្នំពេញ: រថយន្តម៉ាក កាមរីហាយព្រីជមួយគ្រឿង បើកលឿនដល់ផ្លូវកោងមិនបន្ថយល្បឿន ជ្រុលទៅបុករថយន្តកុងតឺន័រ មួយគ្រឿងដែលគេចតចោល នៅចិញ្ចើមផ្លូវ បណ្តាលឲ្យរងការខូចខាត រួចបន្តទៅបុកម៉ូតូកង់បីក្រឡាប់ផ្ងារជើង បណ្តាលឲ្យអ្នកបើកម៉ូតូកង់បី រងរបួស ហើយជ្រុលបន្តទៅបុករបងផ្ទះគេទើបឈប់ទៅមុខលែងរួច។

ហេតុការណ៍នេះបានបង្កឲ្យមានការភ្ញាក់ផ្អើល កាលពីវេលាម៉ោង ១១ យប់ថ្ងៃទី១១ខែឧសភា ឆ្នាំ២០១៧ នៅតាមបណ្តោយផ្លូវសឡា មុខផ្ទះសំណាក់ K2 ស្ថិតក្នុងសង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។

តាមសាក្សីដែលឃើញហេតុការណ៍បានឲ្យដឹងថា មុនពេលកើតហេតុ គេឃើញរថយន្តបង្កម៉ាក កាមរីហាយព្រីជ ពណ៌ស ពាក់ស្លាកលេខ ភ្នំពេញ 2L-7492 បើកដោយបុរសម្នាក់ រួមដំណើរជាមួយ មិត្តភក្តិប្រុសស្រី២នាក់ទៀត នៅក្នុងរថយន្ត សុទ្ធតែស្រវឹង បានធ្វើដំណើរតាមបណ្តោយផ្លូវលេខ៣៧១ ហៅផ្លូវសឡា ក្នុងទិសដៅពីជើងទៅត្បូង ពេលមកដល់ចំណុចកើតហេតុ ដែលជាផ្លូវកោង រថយន្តបង្កបានបត់តាមផ្លូវកោង ក៏វ៉ាក់អឺនិងជ្រុលទៅបុកក្បាល រថយន្តកុងតឺន័រ ដែលចតនៅលើផ្លូវ ចង់ពាក់កណ្តាលផ្លូវនោះ បណ្តាលឲ្យបុកកាងខាងមុខផ្នែកខាងឆ្វេងរងការខូចខាតទាំងសងខាង។

ប្រភពដដែលបន្តទៀតថា ភ្លាមៗនោះរថយន្តបង្កមិនទាន់អស់ល្បឿនក៏ជ្រុលទៅបុកម៉ូតូកង់បីដែលធ្វើដំណើរស្របទិសគ្នាពីក្រោយក្រឡាប់ផ្ងារជើង រងរបួសអ្នកបើកបរ និងចុងក្រោយរថយន្តបង្កជ្រុលបុកផ្ទុបនឹងរបងផ្ទះប្រជាពលរដ្ឋនៅក្បែរនោះទៅមុខលែងរួច។

អ្នកបើករថយន្តកាមរីហាយព្រីជខាងលើ បានប្រាប់Post News ទាំងអាការ:ស្រវឹងថា ពួកគាត់ទើបចេញពីកម្មវិធីការរបស់មិត្តភក្តិ ហើយក៏ហូបគ្រឿងស្រវឹង អស់មួយកេស បានធ្វើដំណើរបណ្តោយផ្លូវខាងលើ ដោយរថយន្តបានបើកល្បឿន ៤០ទៅ៥០ ហើយពេលមកដល់ផ្លូវកោងចំណុចកើត ដែលមានស្ថានភាពងងឹត រថយន្តគាត់ក៏ជ្រុលទៅបុកកុងតឺន័រ មួយគ្រឿងដែលគេចតចោល នៅចិញ្ចើមផ្លូវនិងបន្តទៅបុកម៉ូតូកង់បីមួយគ្រឿង បណ្តាលឲ្យខូចខាតតែម្តង ។

ក្រោយពេលកើតហេតុម្ចាស់កង់បីត្រូវរថយន្តសង្គ្រោះដឹកយកទៅព្យាបាលនៅមន្ទីរពេទ្យ។ ចំណែករថយន្ត កង់បី និងរថយន្តកុងតឺន័រ ត្រូវបានកម្លាំងជំនាញធ្វើការស្ទូចយកទៅរក្សាទុកនៅការិយាល័យចរាចរណ៍ជើងគោករាជធានី ដើម្បីដោះស្រាយនៅពេលក្រោយបន្តទៀត៕