ភ្នំពេញ: ម៉ូតូម៉ាកហុងដាឌ្រីមសេ១២៥មួយគ្រឿង ត្រូវបានប្រជាពលរដ្ឋប្រទះឃើញនៅក្នុងដីឡូត៍មួយកន្លែង រយ:ពេល២ថ្ងៃកន្លង មកហើយអត់ដឹងថាមានបញ្ហាអ្វីទេ ហើយក៏មិនបានឃើញមាននរណាទៅយកចេញឡើយ ដោយសារតែខ្លាចមានពាក់ព័ន្ធទៅនឹង បទល្មើសអ្វីមួយទើបប្រជាពលរដ្ឋប្ដឹងឲ្យនគរបាលប៉ុស្ដិ៍កាកាប ចុះទៅពិនិត្យមើលនិងនាំយករក្សាទុកនៅប៉ុស្ដិ៍ ដើម្បីធ្វើការស្រាវជ្រាវ បន្ត។

នគរបាលបានចុះទៅយកម៉ូតូនោះ កាលពីវេលាម៉ោងជាង១១ថ្ងៃត្រង់ថ្ងៃទី១៤ ខែឧសភា ឆ្នាំ២០១៧ នៅក្នុងដីឡូត៍មួយកន្លែង ដែលមានទីតាំងស្ថិតនៅក្នុងភូមិប៉ប្រកខាងជើង សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ ។ ម៉ូតូ១គ្រឿងនោះម៉ាកហុងដា ឌ្រីម សេ១២៥ ស៊េរីឆ្នាំ២០១៤ ពណ៌ខ្មៅ ពាក់ស្លាកលេខ ភ្នំពេញ1CI-0112 ប៉ុន្តែស្លាកលេខនោះមិនបានពាក់ជាប់ម៉ូតូនោះឡើយ គឺត្រូវបានជនមិនស្គាល់មុខដោះទុកក្រោមកែបម៉ូតូទៅវិញ។

នគរបាលបានឲ្យដឹងថាម៉ូតូនោះត្រូវបានជនមិនស្គាល់មុខយកទៅប្លុងចោលនៅក្នុងដីឡូត៍ទំនេរ មួយកន្លែងនៅក្នុងភូមិខាងលើនោះ តាំងពីថ្ងៃទី១២ ខែឧសភា មកម្ល៉េះដោយមិនដឹងថា ម៉ូតូនោះមានបញ្ហាអ្វីនោះទេ ទើបត្រូវគេយកទៅប្លុង ចោលបែបនេះទៅវិញ។ ប៉ុន្តែតាមការសន្និដ្ឋានសង្ស័យថា អ្នកដែលយកម៉ូតូនេះទៅប្លុងចោលគឺជាចោរដែលបានលួលួចយកចេញពីកន្លែងណាមួយ ហើយទំនងមិនអាចយកចេញទៅណាបន្តទៀតបានក៏បានសម្រេចចិត្តប្លុងចោលបែបនេះតែម្ដទៅ។ ទោះបីជាបែបណាពេលនេះកំពុងស្ថិតនៅក្នុងការស្រាវជ្រាវនៅឡើយ ដូច្នេះមិនទាន់ប្រាកដថាជាករណីអ្វីពិតនៅឡើយ ហើយពេលនេះម៉ូតូខាងលើកំពុងត្រូវបានរក្សាទុកនៅប៉ុស្ដិ៍កាកាប ខណ្ឌពោធិ៍សែនជ័យរាជធានីភ្នំពេញ៕