ភ្នំពេញ: សមត្ថកិច្ចប៉ុស្តិ៍ភ្នំពេញថ្មី ឃាត់ខ្លួនជនសង្ស័យប្រើប្រាស់នូវសារធាតុញៀនដោយខុសច្បាប់ចំនួន៣នាក់។

ហេតុការណ៍នេះបានកើតឡើងកាលពីវេលាម៉ោង៤និង៣០នាទីរសៀលថ្ងៃទី១៤ ខែឧសភា ឆ្នាំ២០១៧ ស្ថិតនៅតាមចិញ្ចើមផ្លូវភ្នំពេញហាន់ណូយ ក្នុងភូមិបាយ៉ាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។

ជនសង្ស័យទាំង៣នាក់ ទី១ឈ្មោះ សំ ជូរី អាយុ១៩ឆ្នាំ មុខរបរកម្មកសំណង់ ស្នាក់នៅការដ្ឋានសំណង់ សង្កាត់ព្រែកលៀប ខណ្ឌជ្រោយចង្វាររាជធានីភ្នំពេញ,ទី២ឈ្មោះ ជឹម ចាន់រ៉ា ហៅរ៉ា អាយុ២០ឆ្នាំ មុខរបរកម្មករសំណង់ ស្នាក់នៅការដ្ឋានសំណង់សង្កាត់ព្រែកលៀប ខណ្ឌជ្រោយចង្វាររាជធានីភ្នំពេញ និងទី៣ឈ្មោះ សេង ចិត្ត្រា ហៅត្រា អាយុ២១ឆ្នាំ មុខរបរព្រូឡានស្នាក់នៅការ៉ាស់ឡាន ភូមិបន្លាស្អិត សង្កាត់ឃ្មួញ ខណ្ឌសែនសុខ រាជធានីភ្នំពេញ។

ប្រភពព័ត៌មានពីសមត្ថកិច្ចបានឲ្យដឹងថា មុនពេលកើតហេតុ សមត្ថកិច្ចប៉ុស្តិ៍ភ្នំពេញថ្មីបានធ្វើការល្បាតនៅក្នុងភូមិសាស្រ្ត រហូតមកដល់ចំណុចកើតហេតុខាងលើ ឃើញក្រុមជនសង្ស័យខាងលើ កំពុងឈនៅចិញ្ចើមផ្លូវភ្នំពេញហាន់ណូយ សមត្ថកិច្ចមានការសង្ស័យក៏ហៅសួរនាំរួចនាំខ្លួនជនសង្ស័យទៅអធិការដ្ឋាននគរបាលខណ្ឌសែនសុខដើម្បីសាកសួរហើយធ្វើតេស្តទឹកនោមរបស់ជនសង្ស័យដោយឧបករណ៍ស្វែងរកសារធាតុញៀនតាមរយ:ទឹកនោម។

ជាលទ្ធផលឃើញថាជនសង្ស័យទាំង៣នាក់មានសារធាតុញៀនទើបសមត្ថកិច្ចឃាត់ខ្លួនជនសង្ស័យទាំង៣នាក់តែម្តង។

បច្ចុប្បន្នជនសង្ស័យទាំង៣នាក់ ត្រូវបានឃាត់ខ្លួនបណ្តោះអាសន្ននៅអធិការដ្ឋាននគរបាលខណ្ឌសែនសុខ ដើម្បីចាត់ការតាមនីតិវិធីនៅពេលក្រោយ៕