កណ្តាល: បុរសម្នាក់ ផឹកស៊ីជាមួយមេភូមិ ស្រាប់តែឃើញចិញ្ចៀនមាស៥ជី របស់មេភូមិដូចទំនង ស្រាប់តែខ្ចីពាក់ រួចដាក់មេប្រូចយកទៅលក់បាន៣០០ដុល្លារ ត្រូវមេភូមិដាក់ពាក្យប្តឹងឲ្យសមត្ថកិច្ចឃាត់ខ្លួន។

ហេតុការណ៍នេះបានកើតឡើងកាលពីវេលាម៉ោង១២ ថ្ងៃត្រង់ទី១២ ខែឧសភា ឆ្នាំ២០១៧ នៅចំណុចផ្ទះជនរងគ្រោះ ភូមិអង្គតាសិត ឃុំទួលព្រេជ ស្រុកអង្គស្នួល ខេត្តកណ្តាល ។

ជនរងគ្រោះឈ្មោះ ជិ លីម ភេទប្រុស អាយុ៦៦ឆ្នាំ មុខរបរកសិករ(មេភូមិ) នៅភូមិអង្គតាសិត ឃុំទួលព្រេជ ស្រុកអង្គស្នួល ខេត្តកណ្តាល។ ចំណែកជនសង្ស័យឈ្មោះ យូ ថេន ភេទប្រុស អាយុ៤០ឆ្នាំ មុខរបរកសិករ នៅភូមិអង្គស្រែពោធិ ឃុំទួលព្រេជ ស្រុកអង្គស្នួល ខេត្តកណ្តាល។ សម្ភារ:បាត់បង់មាន៖ ចិញ្ចៀនត្រាធ្វើអំពីមាសទម្ងន់៥ជី។

ប្រភពដដែលបន្តថា មុនពេលកើតហេតុ ជនរងគ្រោះនិងសង្ស័យបានផឹកស្រាបៀជាមួយគ្នានៅមុខផ្ទះជនរងគ្រោះ លុះដល់ម៉ោងកើតហេតុ ប្រពន្ធជនរងគ្រោះ បានយកចិញ្ចៀនមាសមកឲ្យប្តីពាក់ទៅស៊ីការគេ ពេលយកចិញ្ចៀនមកដល់ ជនសង្ស័យខ្ចីពាក់លមើល បន្ទាប់មកជនរងគ្រោះបានចេញទៅជូនភ្ញៀវមកខាងក្រៅផ្ទះបន្តិច ហើយត្រឡប់មកវិញ ជនសង្ស័យក៏គេចខ្លួនទៅបាត់។ ដល់ម៉ោង១១និង៣០នាទីយប់ ទើបមកសួរជនសង្ស័យដល់ផ្ទះថាសុំមាសមកវិញ ពេលនោះជនសង្ស័យបដិសេធថាខ្លួនមិនបានយកទេ នៅថ្ងៃទី១៣ខែឆ្នាំដដែល ទើបជនរងគ្រោះមកដាក់ពាក្យបណ្ដឹងនៅប៉ុស្តិ៍ទួលព្រេជ ដល់ថ្ងៃទី១៤ វេលាម៉ោង១០និង៣០នាទី ទើបរកជនសង្ស័យឃើញ ហៅមកសួរនាំនៅប៉ុស្តិ៍ តាមចម្លើយសារភាពជនសង្ស័យថា ខ្លួនបានយកចិញ្ចៀនរបស់ជនរងគ្រោះទៅលក់បាន៣០០ដុល្លារ តែពុំស្គាល់អ្នកទិញទេ៕