បាត់ដំបង: តាមសេចក្តីរាយការណ៍ពីភ្នាក់ងារ Post News ប្រចាំខេត្តបាត់ដំបង បានឲ្យដឹងថា មានករណីគ្រោះថ្នាក់ចរាចរណ៍មួយកើតឡើង ដោយរថយន្ត២គ្រឿងពន្លោះគ្នាពេញទំហឹងលាន់ដូនរន្ទះ ខ្ទាតទៅចំណែកផ្លូវម្ខាងម្នាក់ សំណាងណាស់គ្មានអ្នករងរបួស។

ហេតុការណ៍នេះបានកើតឡើងកាលពីវេលាម៉ោង៣រសៀល ថ្ងៃទី១៦ ខែឧសភា ឆ្នាំ២០១៧ ស្ថិតនៅចំណុចក្រុមទី១៣ ភូមិភ្ជាវ ឃុំត្រែង ស្រុករតន:មណ្ឌល ខេត្តបាត់ដំបង។

តាមប្រភព័ត៌មានពីសមត្ថកិច្ចបានឲ្យដឹងថា ករណីគ្រោះថ្នាក់ចរាចរណ៍នេះ កើតឡើងរវាងរថយន្តម៉ាកហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ 3B-8362អ្នកបើកបររត់បាត់ បានបើកមកបុកជាមួយនឹងរថយន្តម៉ាកឡិចស៊ីស ពណ៌ស្ករ ពាក់ស្លាកលេខ ភ្នំពេញ 2N-3348 បើកបរដោយឈ្មោះ ណៃ គា អាយុ៣២ឆ្នាំ ស្នាក់នៅភូមិកន្ទឺ ឃុំប៉ុកកន្ទឺ ស្រុកបាណន់ ខេត្តបាត់ដំបង ដែលកំពុងបើកបរក្នុងទិសពីកើត ទៅលិច (បាត់ដំបងទៅប៉ៃលិន) ក្នុងទិសដៅបញ្ច្រាសទិសគ្នាជាមួយរថយន្តម៉ាកហ៊ីយ៉ាន់ដាយ បណ្តាលឲ្យរថយន្តឡិចស៊ីស ធ្លាក់ពីលើផ្លូវរងការខូចខាតយ៉ាងដំណំ។ ចំណែករថយន្យហ៊ីយ៉ាន់ដាយវិញ រេគូទរថយន្តមួយត្រឡប់ ធ្លាក់គូទពីលើផ្លូវនៅតែក្បាលទំជាប់បន្តិច។ តែទោះបីជាយ៉ាងណា ក្នុងករណីគ្រោះថ្នាក់ចរាចរណ៍នេះមិនបានបណ្តាលឲ្យនរណាម្នាក់រងរបួសនោះទេ។

ក្រោយកើតហេតុ សមត្ថកិច្ចនគរបាលស្រុករតន:មណ្ឌល បានធ្វើការវាស់វែង និងយករថយន្តទាំង២ទៅរក្សាទុកនៅស្នងការដ្ឋាននគរបាលចរាចរណ៍ខេត្ត រង់ចាំដោះស្រាយគ្នានៅពេលក្រោយតាមផ្លូវច្បាប់៕