ព័ត៌មានជាតិ

ទាំងព្រលឹម! សមត្ថកិច្ចកម្ពុជាចុះឃាត់ខ្លួនជនជាតិវៀតណាមខុសច្បាប់ជិត៣០នាក់នៅខណ្ឌមានជ័យ

ភ្នំពេញ: កម្លាំងនគរបាលនៃអគ្គនាយកដ្ឋានអន្តោវេសន៍ក្រសួងមហាផ្ទៃ បើកប្រតិបត្តិការ ចុះត្រួតពិនិត្យនិងឆែកឆេរការស្នាក់នៅ និងការប្រកបការងារ របស់ជនបរទេសនៅរកឃើញជនជាតិវៀតណាមប្រុសស្រីខុសច្បាប់ចំនួន២៨នាក់ យកមកធ្វើការសាកសួរ។

ការបង្ក្រាបនេះបានធ្វើឡើងកាលពីវេលាម៉ោង៦ព្រឹក ថ្ងៃទី១៧ ខែឧសភា ឆ្នាំ២០១៧ ស្ថិតនៅតាមបណ្តោយមាត់ទន្លេ ផ្លូវជាតិលេខ២ ភូមិទួលរកា សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ។

ប្រតិបត្តិការនេះដែរ មានការសម្របសម្រួល ដោយលោក សៀង សុខ ព្រះរាជអាជ្ញារង អមសាលាដំបូងរាជធានីភ្នំពេញ ដឹកនាំកម្លាំងដោយ លោក ឧត្តមសេនីយ៍ទោ អ៊ុក ហៃសីឡា ប្រធាននាយកដ្ឋានស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្តោប្រវេសន៍ក្រសួងមហាផ្ទៃ សហការជាមួយនិងនគរបាលគ្រប់គ្រងជនបរទេស នៃស្នងការដ្ឋាននគរបាលរាជធានីភ្នំពេញ រួមនឹងនគរបាលប៉ុស្តិ៍ចាក់អង្រែក្រោម និងនគរបាលខណ្ឌមានជ័យ។

ជាលទ្ធផលក្នុងការចុះត្រួតពិនិត្យខាងលើនេះដែរ សមត្ថកិច្ចបានធ្វើការត្រួតពិនិត្យនិង ឃាត់ខ្លួនជនជាតិវៀតណាមប្រុសស្រីចំនួន២៨នាក់ ក្នុងនោះមានស្រី១២នាក់ បន្ទាប់ពីរកឃើញថា ពួកគាត់បានលួចឆ្លងដែនខុសច្បាប់ ចូលមកស្នាក់នៅនិងប្រកបការងារក្នុងប្រទេសកម្ពុជាដោយពុំមានឯកសារត្រឹមត្រូវស្របតាមច្បាប់ប្រទេសកម្ពុជា។

ដូច្នេះហើយចំពោះជនជាតិវៀតណាមទាំង២៨ នាក់ខាងលើ ត្រូវបានសមត្ថកិច្ចបញ្ជូនខ្លួនមកកាន់ អគ្គនាយកដ្ឋានអន្តោប្រវេសន៍ក្រសួងមហាផ្ទៃ ដើម្បីកសាងសំណុំរឿងចាត់ការតាមនីតិវិធីច្បាប់របស់ប្រទេសកម្ពុជាបន្តទៀត៕

មតិយោបល់