កំពតៈ នៅរសៀលទី១៧ ខែឧសភានេះ ក្រុមប្រជាពលរដ្ឋប្រមាណជាង៤០គ្រួសារ មកពីភូមិត្រពាំងផ្លាំង ឃុំតេជោអភិវឌ្ឍ ស្រុកឈូក ខេត្តកំពត បានលើកគ្នាសុំការអន្តរាគមន៍សារជាថ្មីពីអាជ្ញាធរ ខណៈវិវាទដីធ្លីរវាងពលរដ្ឋ និងក្រុមហ៊ុនអ្នកមានអំណាចមួយនៅពុំទាន់បញ្ចប់។

ពលរដ្ឋដែលបានមកសុំកិច្ចអន្តរាគមន៍ពីអាជ្ញាធរ បានចោទប្រកាន់ក្រុមហ៊ុនមួយ ដែលគ្រប់គ្រងដោយលោក អាំ ផល្លីននិង ហ៊ាង គន្ធី ថាបានរំលោភយកដីដំណាំរបស់ពួកគាត់ ដោយបំពានទាំងច្បាប់ថែមទៀត។

ពលរដ្ឋដដែលបានរៀបរាប់ថា បើទោះជាអាជ្ញាធរខេត្ត បានវាស់វែងដីធ្លីក្នុងទីតាំងទំនាស់នោះ ជូនពួកគាត់ហើយក៏ដោយ ក៏ពួកគាត់ពុំទាន់បានបណ្ណកម្មសិទ្ធិគ្រប់គ្រង និងអាចអាស្រ័យផលលើដីទាំងនោះបានដែរ ដោយសារតែក្រុមហ៊ុនរបស់អ្នកមានអំណាចខាងលើ បានប្រើគ្រប់វិធីសាស្ត្រ រារាំងពលរដ្ឋ មិនឲ្យចូលទៅជាន់ដីទាំងនោះបាន។

ថ្លែងប្រាប់សារព័ត៌មាន នៅក្នុងពេលតវ៉ានោះ ពលរដ្ឋម្នាក់បាន លើកឡើងថា ពលរដ្ឋចំនួន១៨៩ គ្រួសារដែលរស់នៅភូមិត្រពាំងផ្លាំង ឃុំតេជោអភិវឌ្ឍ កំពុងរងនូវការឈឺចាប់យ៉ាងខ្លាំង ជីវភាពខ្វះខាត បាត់បង់ដីដាំដំណាំ និងអាស្រ័យផល ដោយសារតែរឿងវិវាទដីធ្លីដ៏រ៉ាំរ៉ៃមួយនេះ។ ពួកគាត់បន្តថា ជារឿយៗខាងក្រុមហ៊ុន តែងតែធ្វើបាប ពលរដ្ឋគ្រប់បែបយ៉ាង មានទាំងវាយដំ គំរាមសម្លាប់ ប្រើហិង្សាផ្សេងៗ បើសិនពលរដ្ឋព្យាយាមចូលទៅកាន់កាប់ដីទាំងនោះ។

ការនាំគ្នាមកសុំអន្តរាគមន៍ពីអាជ្ញាធរលើកនេះ ពួកគាត់ពុំចង់បានអ្វីក្រៅពី ចង់សុំអាជ្ញាធរ ជួយរកដំណោះស្រាយឲ្យពួកគាត់ ដើម្បីបានកាន់កាប់ដីធ្លីឡើងវិញ ដោយពុំមានការតាមព្យាបាទពីក្រុមហ៊ុនឲ្យសោះ ព្រោះជីវភាពពួកគាត់សព្វថ្ងៃគ្មានអ្វីទីពឹងក្រៅពីដីធ្លីទាំងនោះទេ។(បទសំភាសន៍)

ទាក់ទងនឹងការចោទប្រកាន់លើក្រុមហ៊ុន អាំ ផល្លីន និងអ្នកស្រីហ៊ាង គន្ធី រឿងរំលោភយកដីប្រជាពលរដ្ឋខាងលើ យើងពុំអាចទំនាក់ទំនងសុំការពន្យល់ពីក្រុមហ៊ុនបានទេ នៅរសៀលទី១៧នេះ។

ក៏ប៉ុន្តែ លោក ខៀវ រិទ្ធិភ័ណ្ឌ អភិបាលស្រុកឈូក បានមានប្រសាសថា លោកពុំទាន់បានដឹងច្បាស់ទេអំពីបញ្ហានេះ តែអាជ្ញាធរកំពុងតែរិះរកវិធីសាស្ត្រដោះស្រាយដ៏ល្អ ដើម្បីឲ្យភាគីពលរដ្ឋ និងភាគីម្ខាងទៀតទទួលយកបានទាំងអស់គ្នា ។

ទាក់ទងនិងសំណូមពររបស់ប្រជាពលរដ្ឋខាងលើ លោក វ៉ែន ស៊ីថា នាយករដ្ឋបាលសាលាខេត្តកំពត បានមានប្រសាសថា សំណុំរឿងវិវាទដីធ្លីនេះ ពិបាកសម្រេចខ្លាំងណាស់ព្រោះ មានជាប់ពាក់ព័ន្ធពីពលរដ្ឋមួយទៅពលរដ្ឋ គ្មានឈប់ឈរ យ៉ាងណាក៏ដោយខេត្តនិងទទួលសំណូមពរ ពលរដ្ឋ ដើម្បីជម្រាបជូនអភិបាលខេត្ត ជាអ្នកសម្រេច ក្នុងពេលឆាប់ៗនេះ៕

https://youtu.be/zCbyWjLY374