ភ្នំពេញ: រថយន្តដឹកត្រីមួយគ្រឿង បានរេចង្កូតទៅបុកសួនច្បារ នៅតាមបណ្តោយផ្លូវជាតិលេខ៥ ស្ថិតក្នុងសង្កាត់ឫស្សីកែវ ខណ្ឌឫស្សីកែវ បង្កឲ្យមានការភ្ញាក់ផ្អើលយ៉ាងខ្លាំង ដល់សមត្ថកិច្ចចុះទៅអន្តរាគមន៍ទាំងយប់ កាលពីវេលាម៉ោង៤ និង១០នាទីយប់ ថ្ងែទី១៨ ខែឧសភា ឆ្នាំ២០១៧ ។

ប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុគេបានឃើញរថយន្តដឹកត្រីមួយគ្រឿងម៉ាក ដែលមានពាក់ស្លាកលេខ ភ្នំពេញ 3B-5080 បានធ្វើដំណើរតាមបណ្តោយផ្លូវជាតិលេខ៥ ក្នុងទិសដៅពីត្បូងទៅជើង ខណ:ពេលមកដល់កន្លែងកើតហេតុ រថយន្តក៏បានរេចង្កូតជ្រុលទៅបុកសួនច្បារនៅតាមបណ្តោយផ្លូវខាងលើពេញទំហឹង បណ្តាលឲ្យរថយន្តជាប់នៅក្នុងសួនច្បារ ទៅមុខក៏មិនកើត ថយក្រោយក៏មិនរួច បង្កឲ្យមានការភ្ញាក់ផ្អើលយ៉ាងខ្លាំង រួមទាំងសមត្ថកិច្ចចុះមកអន្តរាគមន៍ទាំងយប់តែម្តង។

ចំណែកអ្នកបើកបររថយន្តខាងលើបានបញ្ជាក់ប្រាប់ថា មុនពេលកើតហេតុគាត់បានបើករថយន្តដឹកត្រីមួយគ្រឿង ដែលមានពាក់ស្លាកលេខ ភ្នំពេញ 3B-5080 បានធ្វើដំណើរតាមបណ្តោយផ្លូវជាតិលេខ៥ ក្នុងទិសដៅពីត្បូងទៅជើង លុះមកដល់ចំណុចកើតហេតុ រថយន្តបានរបូតរ៉ូទីល បណ្តាលឲ្យរថយន្តរេចង្កូតចូលមកឆ្វេង ជាន់ហ្វ្រាំមិនទាន់ ក៏បានជ្រុលទៅបុកសួនច្បារខាងលើតែម្តងទៅ សំណាងល្អហើយដែលមិនបង្កឲ្យនរណាម្នាក់រងរបួស គ្រាន់តែខូចខាតរបាំងថ្មដែលនៅជាប់នឹងសួនច្បារតែប៉ុណ្តោះទេ ។

ក្រោយពេលកើតហេតុសមត្ថកិច្ចជំនាញបានចុះមកធ្វើការវាស់វែងយករថយន្តទៅរក្សាទុកនៅការិយាល័យស្នងការនគរបាលរាជធានីភ្នំពេញដើម្បីរង់ចាំម្ចាស់រថយន្តមកធ្វើការដោះស្រាយតាមនីតិវីធីច្បាប់ផងដែរ ៕