សៀមរាបៈ យោងតាមសេចក្តីរាយការណ៍បានឲ្យដឹងថា មានករណីគ្រោះថ្នាក់ចរាចរណ៍ដ៏រន្ធត់មួយ បានកើតឡើង បន្ទាប់ពីមានរថយន្តម៉ាក ហ៊ីយ៉ាន់ដាយ ដឹកដែកមួយគ្រឿង បើកបុកម៉ូតូសង់ពេញទំហឹង កិនបុរសម្នាក់ និងស្ត្រីជាប្រពន្ធរបួសធ្ងន់ ចំណែកម៉ូតូត្រូវអូសជាប់ខាងក្រោមរថយន្តបង្កអូសជាង១គីឡូម៉ែត្រ ទើបឃាត់រថយន្តបង្កបាន។

ហេតុការណ៍នេះបានកើតឡើងកាលពីវេលាម៉ោង ១០ និង១០នាទីព្រឹក ថ្ងៃទី២០ ខែឧសភា ឆ្នាំ២០១៧ ស្ថិតនៅចំណុចផ្សារលើ ក្នុងក្រុងសៀមរាប ខេត្តសៀមរាប។

យោងតាមប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុគេបានឃើញ ម៉ូតូម៉ាកហុងដាសេ១២៥ ពណ៌ខ្មៅ មួយគ្រឿងពាក់ស្លាកលេខ បន្ទាយមានជ័យ 1K-8149 ជិះឌុបគ្នា២នាក់ប្តីប្រពន្ធ លុះបានមកដល់ចំណុចផ្សារលើ ក្រុងសៀមរាប ស្រាប់តែមានរថយន្តបង្ក ម៉ាក ហ៊ីយ៉ាន់ដាយដឹកដែក ពណ៌ស ពាក់ស្លាកលេខ ភ្នំពេញ 3C-5761(ស្លាកលេខពីមុខ) និងកន្ទុយខាងក្រោយ ពាក់ស្លាកលេខ ព្រះសីហនុ 4A-1989 ដឹកដែកចេញពីភ្នំពេញ យកមកបោះដាក់ឲ្យម៉ូយនៅម្តុំជិតផ្សារប្រិមប្រិយ ក្នុងខេត្តសៀមរាប បានជ្រុលចង្កូតមកបុកម៉ូតូជនរងគ្រោះពេញទំហឹង បណ្តាលឲ្យបុរសជាប្តី ត្រូវរថយន្តបង្កកិនស្លាប់នៅនឹងកន្លែងយ៉ាងរន្ធត់។ ចំណែកស្ត្រីជាប្រពន្ធរងរបួសធ្ងន់។ ដោយឡែកម៉ូតូវិញ ត្រូវរថយន្តបង្ក អូសជាប់កល់ខាងក្រោមរថយន្ត បើករត់ជាង១គីឡូម៉ែត្រពីកន្លែងកើតហេតុ បង្កការភ្ញាក់ផ្អើលយ៉ាងខ្លាំង រហូតមកដល់ចំណុចស្ពានថ្ម មុខព្រះរាជដំណាក់របស់ ព្រះអង្គចេក ព្រះអង្គចម ទើបអាចឃាត់រថយន្តបង្កនិងអ្នកបើកបររថយន្តបង្ក នេះបានតែម្តង។

ក្នុងនោះដែរ ជនសង្ស័យជាអ្នកបើកបរបង្កត្រូវបានគេស្គាល់មានឈ្មោះ ជា សុជាតិ ភេទប្រុស អាយុ២៤ឆ្នាំ ស្នាក់នៅក្នុងភូមិសំបួរ ឃុំសំបួរ ស្រុកល្វាឯម ខេត្តកណ្តាល។

ចំណែកជនរងគ្រោះជាប្តីដែលស្លាប់មានឈ្មោះ ហេង ញ៉ អាយុ៥៦ឆ្នាំ និងប្រពន្ធឈ្មោះ សេង ពៅ អាយុ៥៤ឆ្នាំ មុខរបរជាអ្នកលក់ដូរនៅអង្គរឃ្យូងយូ (រងរបួសធ្ងន់ ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យផងដែរ៕