កណ្តាល: ម៉ូតូ២គ្រឿងបុកគ្នាពេញទំហឹង បណ្តាលឲ្យមនុស្សម្នាក់ស្លាប់ និងម្នាក់ទៀតរងរបួសធ្ងន់ ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ។

ហេតុការណ៍នេះកើតឡើងកាលពីវេលាម៉ោង៤និង២០នាទីល្ងាច ថ្ងៃទី២១ ខែឧសភា ឆ្នាំ២០១៧ ស្ថិតនៅចំណុចផ្លូវលេខ២១អា ភូមិសិត្បូ ឃុំសិត្បូស្រុកស្អាង ខេត្តកណ្ដាល។

ជនរងគ្រោះមានឈ្មោះ ឃៀង សុខឃា ភេទប្រុស អាយុ២៩ឆ្នាំ មុខរបរកម្មករ(ស្លាប់នៅនឹងកន្លែងកើតហេតុ) ស្នាក់នៅភូមិកំពង់ព្រីង ឃុំសិត្បូ ស្រុកស្អាង ខេត្តកណ្តាល (ពាក់មួកការពារ) បានបើកបរម៉ូតូម៉ាកហុងដា សេ១២៥ ពណ៌ខ្មៅ ពាក់ស្លាកលេខ ភ្នំពេញ 1CF-2896 ធ្វើដំណើរពីជើងមកត្បូង។ លុះពេលមកដល់ចំណុចកើតហេតុ ក៏បានបុកជាមួយនិងម៉ូតូមួយគ្រឿងទៀតម៉ាកហុងដា សេ១២៥ ពណ៌ខ្មៅ ពាក់ស្លាកលេខ ភ្នំពេញ 1CI-2263 បើកបរដោយឈ្មោះ យ៉យ ណៃ ភេទប្រុស អាយុ២១ឆ្នាំ មុខរបរកម្មករ មានស្រុកកំណើតនៅខេត្តព្រៃវែង (រងរបួសធ្ងន់) បច្ចុប្បន្នស្នាក់នៅភូមិព្រែកតាព្រីង ឃុំសិត្បូ ស្រុកស្អាង ខេត្តកណ្តាល (មិនពាក់មួកការពារ)។ ដែលបើកបញ្ច្រាសទិសគ្នាពីត្បូងមកជើង បណ្ដាលឲ្យស្លាប់ម្នាក់ និងរងរបួសធ្ងន់ម្នាក់។

ចំពោះសាកសព ត្រូវបានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី។ ចំណែកអ្នករងរបួសធ្ងន់ត្រូវបានក្រុមគ្រួសារដឹកយកទៅសង្គ្រោះនៅមន្ទីរពេទ្យភ្នំពេញ។ រីឯវត្ថុតាងទាំង២ត្រូវបានយកមករក្សាទុកនៅអធិការដ្ឋាននគរបាលស្រុកស្អាង ដើម្បីកសាងសំណុំរឿងទៅតាមនីតិវិធីនៃច្បាប់៕