ភ្នំពេញៈ ជនសង្ស័យម្នាក់ ប្រកបមុខរបរជាកូនជាងដែក ធ្វើសកម្មភាពលួចគ្រឿងអលង្ការរបស់មេជាងបានសម្រេច ព្យាយាមគេចខ្លួនតែត្រូវមេជាងឃើញទាន់ស្រែកផ្អើលប្រជាពលរដ្ឋដេញតាមចាប់បាន ព្រួតវាយឡើងទ្រោមខ្លួនរហូតសន្លប់ស្តូកស្ដឹងទើបប្រគល់ឲ្យសមត្ថកិច្ច។

ហេតុការណ៍នេះបានកើតឡើងកាលពីយប់ឈានចូលថ្ងៃទី២០ ខែមិថុនា ឆ្នាំ២០១៧ ស្ថិតនៅចំណុចក្បែររង្វង់មូលខាំកូស៊ីធី ស្ថិតក្នុងសង្កាត់ទួលសង្កែ ខណ្ឌឫស្សីកែវ រាជធានីភ្នំពេញ។

សមត្ថកិច្ចបានឲ្យដឹងថា ជនសង្ស័យខាងលើនេះមានឈ្មោះ សុទ្ធ រិទ្ធី ភេទប្រុស អាយុប្រហែល២០ឆ្នាំជាង មុខរបរធ្វើជាកូនជាងដែក ស្នាក់នៅជាមួយជនរងគ្រោះជាមេជាង និងមានស្រុកកំណើត នៅឯខេត្តកណ្ដាល ត្រូវប្រជាពលរដ្ឋព្រួតគ្នាវាយរហូតដល់សន្លប់ ។

បើតាមប្រភពព័ត៌មានបានឲ្យដឹងថា ដោយសារតែជនរងគ្រោះជាមេជាង ជាប់រវល់ការងារច្រើនមិនបានចាប់អារម្មណ៍ ស្រាប់តែជនសង្ស័យជាកូនជាងដែលបម្រុងលាឈប់ពីការងារ បានឆ្លៀតឱកាសធ្វើសកម្មភាពលួចគាស់ទូដែកយកបានទាំងសម្ភារៈ និងគ្រឿងអលង្ការមួយចំនួន ហើយរត់គេចខ្លួនទៅលេងល្បែងហ្គេម បានត្រឹមតែប៉ុន្មានម៉ោងក្រោយ ក៏លេចលឺព័ត៌មានតាមប្រជាពលរដ្ឋរាយការណ៍មកមេជាងថា បានប្រទះឃើញជនសង្ស័យ ទើបឈានដល់ការឃាត់ខ្លួន រួមជាមួយវត្ថុតាងដែលរកឃើញ និងដកហូតបាន នាំមកកាន់ប៉ុស្ដិ៍នគរបាលទួលសង្កែ ដើម្បីធ្វើការសាកសួរ និងកសាងសំណុំរឿង បញ្ជូនខ្លួនទៅកាន់អធិការដ្ឋាននគរបាលខណ្ឌឫស្សីកែវ ដើម្បីចាត់ការបន្តតាមផ្លូវច្បាប់៕