ភ្នំពេញ: យ៉ាងហោចណាស់ បុរសម្នាក់បានស្លាប់ បន្ទាប់ពីជិះម៉ូតូក្នុងល្បឿនលឿន ព្យាយាមវ៉ា រថយន្តដែលបើកស្របគ្នា តែមិនផុត ក៏បណ្តាលឲ្យជ្រុលទៅបុកនឹងម៉ូតូមួយគ្រឿងទៀតពេញទំហឹង។

ហេតុការណ៍នេះបានកើតឡើងកាលពីវេលាម៉ោង៦ និង៤៥ នាទីយប់ថ្ងៃទី២២ ខែឧសភា ឆ្នាំ២០១៧ ស្ថិតនៅត្រង់ចំណុចផ្លូវបេតុង ក្នុងភូមិសំរោង សង្កាត់ឃ្មួញ ខណ្ឌសែនសុខ រាជធានីភ្នំពេញ។

សាកសពជនរងគ្រោះខាងលើនេះ ត្រូវបានគេស្គាល់មានឈ្មោះ កុក លីដា អាយុ៣២ឆ្នាំ មុខរបរកសិករ ស្នាក់នៅភូមិឃ្មួញ សង្កាត់ឃ្មួញ ខណ្ឌសែនសុខ។

តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេបានឃើញ ជនរងគ្រោះជិះម៉ូតូម៉ាកហុងដាសេ១២៥ ពណ៌ខ្មៅ ពាក់ស្លាកលេខ ភ្នំពេញ 1FG-1051 ក្នុងល្បឿនយ៉ាងលឿន លុះមកដល់ត្រង់ចំណុចកើតហេតុ ម៉ូតូជនរងគ្រោះបានព្យាយាមវ៉ារថយន្តក្រុង ប្រភេទ២៥កៅអី មួយគ្រឿង តែវ៉ាមិនផុត ជ្រុលទៅបុកនឹងម៉ូតូមួយគ្រឿងទៀតម៉ាកហុងដាសង់ប៊ិច ពណ៌ខ្មៅ ពាក់ស្លាកលេខ 1BG -3390 យ៉ាងពេញទំហឹង បណ្តាលឲ្យម៉ូតូទាំង២គ្រឿង ខ្ទាតចេញពីគ្នាចម្ងាយ៣០ ម៉ែត្រ និងបណ្តាលឲ្យភាគីម៉ូតូសង់០១៥ ដួលបោកក្បាលនឹងថ្នល់ ស្លាប់ភ្លាមៗនៅនឹងកន្លែងកើតហេតុ ។ ចំណែកភាគីខាងម៉ូតូសង់ប៊ិចវិញ រងការខូចខាតម៉ូតូ និងរបួសបាក់ដងកាំបិតខាងឆ្វេង។

ក្រោយកើតហេតុ សមត្ថកិច្ចនគរបាលចរាចរណ៍ខណ្ឌសែនសុខ សហការជាមួយនិងនគរបាលចរាចរណ៍ក្រុង ចុះមកធ្វើការវាស់វែងយកម៉ូតូទាំង២គ្រឿងទៅរក្សាទុកនៅការិយាល័យចរាចរណ៍ជើងគោកនៃស្នងការដ្ឋាននគរបាលរាជធានីភ្នំពេញ ដើម្បីធ្វើការដោះស្រាយគ្នាពេលក្រោយតាមផ្លូវច្បាប់។ ចំណែកសពជនរងគ្រោះត្រូវបានសមត្ថកិច្ចប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី៕