កណ្តាល: នៅព្រឹកថ្ងៃទី២៣ ខែឧសភា ឆ្នាំ២០១៧ កម្លាំងការិយាល័យ ចរាចរណ៍ផ្លូវគោកនៃស្នងការដ្ឋាននគរបាលខេត្តកណ្តាល បានបញ្ជូនតៃកុងរថយន្តFUSOស្រវឹងគ្រឿងញៀន បើកបុករថយន្តឡិស៊ីស 570 ស៊េរីឆ្នាំ២០១៧ ចំពីក្រោយ បណ្តាលឲ្យខូចខាតយ៉ាងដំណំ មកតុលាការ ដើម្បីធ្វើការវិនិច្ឆ័យទោសទៅតាមផ្លូវច្បាប់។

តៃកុងរថយន្តFUSO ស្រវឹងគ្រឿងញៀនរូបនេះ កំពុងស្ថិតក្រោមការសាកសួររបស់តំណាងអយ្យការសាលាដំបូងខេត្តកណ្តាល។

សូមរំលឹកថា កាលពីថ្ងៃទី២១.០៥.២០១៧ វេលាម៉ោង៨ និង៤៥នាទី ចំណុចផ្លូវលំភូមិខ្លាកូន ឃុំពើក ស្រុកអង្គស្នួល ខេត្តកណ្ដាល មានរថយន្តមួយគ្រឿងFUSO ប្រភេទ (បែន) ពណ៌ក្រហម ឆ្នូតទឹកមាស ពាក់ស្លាកលេខ ព្រៃវែង 3A-0376 ម្ចាស់កម្មសិទ្ធ ឈ្មោះ ទុន សម្បត្តិ ភេទប្រុស អាយុ៣០ឆ្នាំ ទីលំនៅផ្ទះលេខ៧7Eo ផ្លូវ១១៨ សង្កាត់ទួលស្វាយព្រៃ១ ខណ្ឌចម្ការមន ភ្នំពេញ អ្នកបើកបរ ឈ្មោះ អឿន លាប ភេទប្រុស អាយុ៣០ឆ្នាំ មុខរបរ តៃកុងឡាន ទីលំនៅ ភូមិសំរោង ឃុំសូភី ស្រុកបាទី ខេត្តតាកែវ បានបើកពីទិសខាង ត្បូងទៅទិសខាងជើង លុះដល់ចំណុចកើតហេតុខាងលើបានបុកចំពីក្រោយរថយន្តមួយគ្រឿងទៀត ម៉ាកឡិចស៊ីស 570 ស៊េរី២០១៧
ពណ៌ស គ្មានស្លាកលេខ បើកបរដោយឈ្មោះ អូន សុខុម ភេទ ប្រុស អាយុ ៣៧ឆ្នាំ ទីលំនៅផ្ទះលេខB៨ សង្កាត់ទឹកល្អក់៣ ខណ្ឌទួលគោក ភ្នំពេញ បើកបរពីទិសខាងត្បូងទៅទិសខាងជើងមុខរបរ អ្នកបើកបរថយន្ត បើកបរក្នុងទិសដៅស្របទិសគ្នា ។ អ្នកបើកបរថយន្ត FUSO ត្រូវបានឃាត់ខ្លួននៅអធិការដ្ឋាននគរបាលស្រុក ដើម្បីសាកសួរបំភ្លឺ។

តាមចម្លើយរបស់ឈ្មោះ អឿន លាប ជាតៃកុងឡាន FUSO បានប្រាប់ឲ្យដឹងថា រយ:ពេលកន្លងមកខ្លួនធ្លាប់ប្រើប្រាស់គ្រឿង ញៀន ទើបតែមួយសប្ដាហ៍ ប៉ុណ្ណោះដែលមិនបានប្រើប្រាស់ ហើយសមត្ថកិច្ចបានធ្វើតេស្ដ ទឹកនោម លទ្ធផល តៃកុងឡានFUSO ពិតជាមានសាធាតុញៀននៅក្នុងខ្លួន ពិតប្រាកដមែន៕