ផ្តន្ទាទោសជនជាតិនីហ្សេរីយ៉ា២នាក់ ដាក់ពន្ធនាគារម្នាក់ៗអស់១ជីវិត

ភ្នំពេញៈ កាលពីរសៀលថ្ងៃទី២៤ ខែឧសភា ឆ្នាំ២០១៧ កន្លងទៅ លោក ហេង កេសរោ ប្រធានក្រុមប្រឹក្សាចៅក្រមជំនុំជម្រះនៃសាលាដំបូងក្រុងភ្នំពេញបាន ប្រកាសសាលក្រមសម្រេច ផ្តន្ទាទោសជនជាប់ចោទទី១ឈ្មោះ Okafor Ifeanyi Anthony (អូកាហ្វ័រ អ៊ីហ្វៀនយី អានតូនី) ភេទប្រុស អាយុ៥០ឆ្នាំ និងទី២ឈ្មោះ Adibel Paschall (អាដីប៊ែល ប៉ាស់ស្កាល់) ភេទប្រុស អាយុ ៣៣ឆ្នាំ ជាជនជាតិនីហ្សេរីយ៉ា ពីបទ ដឹកជញ្ជូនដោយខុសច្បាប់នូវសារធាតុញៀន ប្រភេទម្ស៉ៅកាកូអ៊ីន ចំនួន ១,០៣៩.១០ក្រាម (ជាង ១គីឡូ) ប្រព្រឹត្តកាលពីថ្ងៃទី៩ ខែឧសភា ឆ្នាំ២០១៧ នៅចំណុចច្រកទ្វាអាកាសយានដ្ឋានអន្តរជាតិភ្នំពេញ យោងតាមមាត្រា ៤០ នៃច្បាប់ស្តីពី ការត្រួតពិនិត្យគ្រឿងញៀន។

យោងតាមការបញ្ជាក់របស់ លោកវរសេនីយ៍ទោ សារី បុត្រសត្យា នាយការិយាល័យ ក៣ នៃមន្ទីរប្រឆាំងគ្រឿងញៀន ក្រសួងមហាផ្ទៃ បានឲ្យដឹងថា
ក្រោយពីមានសេចក្តីរាយការណ៍ ពីមន្ត្រីជំនាញពាក់ព័ន្ធ និងគយប្រចាំច្រកទ្វាអាកាសយានដ្ឋានអន្តរជាតិភ្នំពេញ សមត្ថកិច្ចការិយាល័យលោក បានសុំគោលការណ៍ពីលោក សៀង សុខ ព្រះរាជអាជ្ញារងអមសាលាដំបូងក្រុងភ្នំពេញ ឃាត់ខ្លួនជនជាប់ចោទទាំង២នាក់ និងបានបញ្ជូនទៅមន្ទីរដើម្បីស្កេនខ្លួន ទីបំផុតរកឃើញគ្រឿងញៀន ច្រកជាគ្រាប់ៗ ចំនួន ៧០គ្រាប់ ទម្ងន់ ១,០៣៩.១០ ក្រាម មានតម្លៃជាលុយប្រមាណជា ៨០ម៉ឺនដុលា្លរអូស្ត្រាលី ដែលជនជាប់ចោទឈ្មោះ Okafor Ifeanyi Anthony (អូកាហ្វ័រ អ៊ីហ្វៀនយី អានតូនី) បានលេបចូលក្នុងពោះ និងបានឲ្យជុះចេញវិញ។

នៅក្នុងសវនាការ កាលពីព្រឹកថ្ងៃទី២៨ ខែមេសា ឆ្នាំ២០១៧ ជនជាប់ចោទឈ្មោះ Okafor Ifeanyi Anthony (អូកាហ្វ័រ អ៊ីហ្វៀនយី អានតូនី) បានសារភាពថា ខ្លួនបានលេបគ្រឿងញៀននោះមកពីប្រទេសអារ៉ាប់រួម ដោយមានជនជាតិនីហ្សេរីយ៉ាដូចគ្នាជួលឲ្យយកទៅលក់ឲ្យម៉ូយនៅ អូស្ត្រាលី ក្នុងតម្លៃ ៨០ម៉ឺនដុល្លារអូស្ត្រាលី។

ដោយឡែកជនជាន់ចោទឈ្មោះ Adibel Paschall (អាដីប៊ែល ប៉ាស់ស្កាល់) បានបដិសេធថាខ្លួនមិនបានប្រព្រឹត្តដូចការចោទប្រកាន់របស់តំណាងអយ្យការនោះទេ៕