កណ្តាលៈ ហេតុការណ៍គ្រោះថ្នាក់ចរាចរណ៍មួយបានកើតឡើង ដោយស្ត្រីម្នាក់ស្រវឹង បានដើរឆ្លងផ្លូវ គាប់ជួនមានរថយន្តមួយគ្រឿងកំពុងបើកលឿនបុកពេញទំហឹង បណ្តាលឲ្យស្លាប់យ៉ាងអាណោចអាធ័ម រីឯរថយន្តរត់គេចបាត់ស្រមោល។

ហេតុការណ៍នេះបានកើតឡើងកាលពីវេលាម៉ោង៨និង៥៥នាទីយប់ ថ្ងៃទី១២ ខែមិថុនា ឆ្នាំ២០១៧ ស្ថិតនៅចំណុចលើផ្លូវជាតិលេខ៦ ចន្លោះគីឡូម៉ែត្រលេខ៣៣-៣៤ ក្នុងភូមិវត្តថ្មី ឃុំព្រែកដំបង ស្រុកមុខកំពូល ខេត្តកណ្តាល។

សាកសពស្ត្រីខាងលើនេះមានឈ្មោះ ថុល ភេទស្រី អាយុ៦៥ឆ្នាំ មានទីលំនៅភូមិវត្តចាស់ ឃុំព្រែកដំបង ស្រុកមុខកំពូលខេត្តកណ្ដាល ស្រវឹងស្រាបានឆ្លងកាត់ផ្លូវ(មិនដឹងថាឆ្លងពីណាទៅណានោះទេ) ក៏ត្រូវរថយន្ត១គ្រឿង មិនស្គាល់ម៉ាក ដែលកំពុងបើកបរក្នុងទិសដៅពីជើងទៅត្បូង បុកពេញទំហឹង បណ្ដាលឲ្យស្លាប់នៅកន្លែងកើតហេតុ ចំណែករថយន្តបើករត់គេចបាត់។

រីឯសាកសពជនរងគ្រោះខាងលើ ត្រូវបានសមត្ថកិច្ចធ្វើកំណត់ហេតុ ប្រគល់ឲ្យក្រុមគ្រួសារធ្វើបុណ្យតាមប្រពៃណី៕