ភ្នំពេញ: យុវជនម្នាក់បានរងរបួសយ៉ាងធ្ងន់ធ្ងរ ខណ:ដែលជិះម៉ូតូម៉ាក Zoomer-X មួយគ្រឿងតែម្នាក់ហើយ ហើយក៏ស្រាប់តែមានម៉ូតូម៉ាកហុងដា សេ១២៥ ពណ៌ខ្មៅ មួយគ្រឿងបើកមកទាក់ដៃចង្កូតគ្នាបណ្តាលឲ្យខ្ទាតចូលទៅក្រោមរថយន្តមួយគ្រឿងទៀត កិនបណ្តាលឲ្យរងរបួសយ៉ាងធ្ងន់ធ្ងរនោះ សំណាងល្អមិនបង្កឲ្យគ្រោះថ្នាក់ដល់ជីវិត។

ហេតុការណ៍នេះដែរបានកើតឡើងកាលពីវេលាម៉ោង ១ និង ២០នាទីរសៀល ថ្ងៃទី ១៤ ខែ មិថុនា ឆ្នាំ ២០១៧ នៅចំណុចខាងមុខស្ថានីយ៍ប្រេងឥន្ធន:សូគីម៉ិច (ខាងជើងស្ពានអាកាសស្ទឹងមានជ័យ) ផ្លូវព្រះមុនីរ៉េត ក្នុងសង្កាត់ទំនប់ទឹក ខណ្ឌចម្ការមន រាជធានីភ្នំពេញ។

តាមប្រភពព័ត៌មានពីមន្ត្រីនគរបាលម្នាក់បានប្រាប់ឲ្យដឹងថា យុវជនរងគ្រោះមានឈ្មោះ សុខ ផារិទ្ធ អាយុ ១៧ឆ្នាំ មានទីលំនៅក្នុងភូមិថ្មី សង្កាត់ស្ទឹងមានជ័យ ខណ្ឌមានជ័យ ជិះម៉ូតូម៉ាក Zoomer-X ពណ៌ត្រួយចេក ពាក់ស្លាកលេខ ភ្នំពេញ1GD-9989 មួយគ្រឿង។

មុនពេលកើតហេតុ យុវជនរងគ្រោះជិះម៉ូតូម៉ាក Zoomer-X មួយគ្រឿងខាងលើតែម្នាក់ឯង លុះមកដល់ចំណុចកើតហេតុក៏ស្រាប់តែមានម៉ូតូម៉ាកហុងដា សេ១២៥ ពណ៌ខ្មៅ មិនចាំស្លាកលេខមួយគ្រឿង បើកជ្រេ និងវ៉ាគេ វ៉ាឯងមកពីក្រោយទៅទាក់ដៃចង្កូតបណ្តាលឲ្យដួល ស្របពេលនោះក៏មានរថយន្តម៉ាក FORTUNER ពណ៌ទឹកមាស ពាក់ស្លាកលេខ ភ្នំពេញ2Y-3553 មួយគ្រឿងបើកបរដោយយុវជនម្នាក់ក្នុងល្បឿនយឺតនោះ កិនបណ្តាលឲ្យរងរបួសធ្ងន់តែម្តង ហើយម៉ូតូបង្ក មួយគ្រឿងនោះជិះរត់គេចខ្លួនបាត់ស្រមោល។

ក្រោយពេលកើតហេតុ យុវជនរងគ្រោះត្រូវបានបញ្ជូនទៅធ្វើការព្យាបាលនៅគ្លីនិកឯកជនមួយកន្លែងដែលមានទីតាំងស្ថិតនៅក្បែរកន្លែងកើតហេតុ ចំណែកឯម៉ូតូ និងរថយន្តមួយគ្រឿងនោះ ត្រូវបានកម្លាំងសមត្ថកិច្ចបញ្ជូនយកទៅរក្សាទុកនៅអធិការដ្ឋាននគរបាលខណ្ឌចម្ការមន រង់ចាំធ្វើការដោះស្រាយគ្នាជាបន្តទៅទៀត៕