Post News Media ព័ត៌មានជាតិ ជនជាតិចិនបុកខ...

ជនជាតិចិនបុកខ្មែរបណ្ដាលឲ្យរងរបួសធ្ងន់ ត្រូវបានបញ្ជូនទៅកាន់តុលាការ

ភ្នំពេញ: យោងតាមផេកអគ្គស្នងការដ្ឋាននគរបាលជាតិ បានឲ្យដឹងថា កាលពី​ថ្ងៃ​ទី​១៨​ ខែមិថុនា​ ឆ្នាំ​២០១៩​ កម្លាំង​នគរបាល​ចរាចរណ៍​ផ្លូវគោក​រាជធានី​ភ្នំពេញ​ បាន​បញ្ជូន​ជនជាតិ​ចិន​ម្នាក់​ទៅ​តុលាការ​ ពាក់ព័ន្ធ​ករណី​បង្ក​គ្រោះថ្នាក់​ចរាចរណ៍​បណ្តាល​ឲ្យ​មនុស្ស​២​នាក់​រង​របួសធ្ងន់​។​

​មន្ត្រី​នគរបាល​ចរាចរណ៍​រាជធានី​ភ្នំពេញ​ បានឲ្យដឹង​ថា​កាលពី​ថ្ងៃ​ទី​១៦​ ខែមិថុនា​ ឆ្នាំ​២០១៩​ វេលា​ម៉ោង​ ២៣​និង​៣០​នាទី​ នៅ​ចំណុច​មុខ​ស្ថានីយ៍​ប្រេង​សូ​គី​មិច​ ស្ថិត​នៅ​លើ​ផ្លូវជាតិ​លេខ​១​ សង្កាត់​ក្បាលកោះ​ ខណ្ឌ​ច្បារ​អំពៅ​ រាជធានី​ភ្នំពេញ​ មាន​ករណី​គ្រោះថ្នាក់​ចរាចរណ៍​មួយ​បាន​កើតឡើង​ដោយសារ​រថយន្ត​មួយ​គ្រឿង​ម៉ាក​ TOYOTA​ PRIUS​ ពណ៌​ទឹកប្រាក់​ ពាក់​ស្លាក​លេខ​ ភ្នំពេញ​ 2AG-0723​ បាន​ធ្វើ​ដំណើរ​តាម​បណ្តោយ​ផ្លូវជាតិ​លេខ​១​ ទិស​ដៅ​ពី​កើត​ទៅ​លិច​ លុះដល់​ចំណុច​កើតហេតុ​ខាងលើ​ បាន​បុក​ពីក្រោយ​ម៉ូតូ​កង់​៣​ ឥណ្ឌា​មួយ​គ្រឿង​ដែល​ធ្វើ​ដំណើរ​ស្រប​ទិស​គ្នា​ ម៉ាក​ BAJAJ​ ពណ៌​ស​ ពាក់​ស្លាក​លេខ​ភ្នំពេញ​ 1AD-0827​។​

មន្ត្រី​នគរបាល​ចរាចរ​ណ៍ដដែល​បន្ត​ថា​ ជន​បង្ក​ជា​ជនជាតិ​ចិន​ឈ្មោះ​ HAN​ LIZHU​ ភេទ​ប្រុស​ អាយុ​ ៣៩​ឆ្នាំ​ ស្នាក់​នៅ​ខុន​ដូ​ បន្ទប់​លេខ​១០០៩​ ផ្លូវលំ​ សង្កាត់​ទឹកថ្លា​ ខណ្ឌ​សែន​សុខ​ រាជធានី​ភ្នំពេញ​។​ ចំណែក​ជន​រង​គ្រោះ​ទី​១-​ឡឺ​ន​ សុ​ភ័ក្ត្រ​ ភេទ​ប្រុស​ អាយុ​៣២​ឆ្នាំ​ និង​អ្នក​រួម​ដំណើរ​ឈ្មោះ​ ដា​ សីហា​ ភេទ​ប្រុស​ អាយុ​ ២៥​ឆ្នាំ​ អ្នក​ទាំង​២​នាក់​ មាន​ទីលំនៅ​ភូមិ​ដើម​ចាន់​ សង្កាត់​ច្បារ​អំពៅ​២​ ខណ្ឌ​ច្បារ​អំពៅ​ រាជធានី​ភ្នំពេញ​ ៕