កណ្តាលៈ ករណី ជនសង្ស័យម្នាក់ ត្រូវបានសមត្ថកិច្ចឃាត់ខ្លួន ពាក់ពន្ធ័ករណី រក្សាទុកដោយខុស ច្បាប់នូវសារធាតុញៀន។
កើតហេតុនៅវេលាម៉ោង៧ និង១០នាទីព្រឹក ថ្ងៃទី១៥ ខែមិថុនា ឆ្នាំ២០១៧ នៅចំណុចដីឡូឈ្មោះ ចន្ថា ភូមិលើ ឃុំព្រែកអញ្ចាញ ស្រុកមុខកំពូល ខេត្តកណ្ដាល។

សមត្ថកិច្ចបានឲ្យដឹងថា ជនសង្ស័យឈ្មោះ ហ៊ែល សំបូរ (ហៅនាយបឺត) ភេទប្រុស អាយុ៣៦ឆ្នាំ រស់នៅភូមិតាមាស ឃុំគរ ស្រុកព្រៃឈរ ខេត្តកំពង់ចាម មុខរបរ រត់ម៉ូតូឌុប មានសភាពបែកថ្នាំ។ វត្ថុតាងចាប់យករួមមាន ម្សៅក្រាមពណ៌សថ្លាសង្ស័យសារធាតុញៀនចំនួន១កញ្ចប់តូច,ម៉ូតូម៉ាកហុងដា សេ១២៥ ស៊េរីឆ្នាំ២០០៥ ពណ៌ខ្មៅ ពាក់ស្លាកលេខ កណ្ដាល1A -2493 ចំនួន១គ្រឿង,មួកការពារពណ៌ខ្មៅចំនួន១,ថង់សម្រាប់វេចខ្ចប់ថ្នាំញៀនចំនួន២ថង់,អត្តសញ្ញាណប័ណ្ណ១សន្លឹក។

មុនឈានដល់ការចាប់ឃាត់ខ្លួន កន្លងមកជនសង្ស័យធ្លាប់ប្រើប្រាស់ថ្នាំញៀនតាំងពី ខែមិនា ឆ្នាំ២០១៧ បានទិញថ្នាំញៀនមកពីម្ដុំផ្លូវរទេះភ្លើង ខណ្ឌទួលគោក លុះនៅថ្ងៃទី១៤ ខែមិថុនា ឆ្នាំ២០១៧ ពេលព្រឹក ជនសង្ស័យបានជិះម៉ូតូចេញពីខេត្តកំពង់ចាមមកភ្នំពេញតែម្នាក់ឯង។ ពេលទៅដល់ភ្នំពេញ ជនសង្ស័យបានទៅទិញថ្នាំញៀននៅចំណុចផ្លូវរទេះភ្លើងទួលគោក ពីជនមិនស្គាល់ចំនួន៣កញ្ចប់តូចដោយក្នុង១កញ្ចប់តម្លៃ២០,០០០រៀល។ បន្ទាប់មកជនសង្ស័យបានទៅជួលផ្ទះសំណាក់ដេក នៅជិតចំការចេកជាមួយពួកម៉ាកឈ្មោះរ៉ា ក៏នាំគ្នាជក់ថ្នាំអស់ចំនួន២កញ្ចប់តូច។

លុះមកដល់ថ្ងៃទី១៥ ខែមិថុនា ឆ្នាំ២០១៧ វេលាម៉ោង៥ ល្ងាចជនសង្ស័យក៏ជិះម៉ូតូទៅផ្ទះនៅកំពង់ចាមវិញពេលដល់ចំណុចកើតហេតុឃើញមនុស្សដើរកាត់ផ្លូវ ក៏ឈប់ម៉ូតូហើយវាយគេតែម្ដង ឃើញដូច្នេះប្រជាពលរដ្ឋ ក៏នាំគ្នាចាប់ហើយរាយការណ៍ឲ្យសមត្ថកិច្ចពេលកម្លាំងយើងទៅដល់បានធ្វើការឆែកឆេររកឃើញថ្នាំញៀនចំនួន១កញ្ចប់តូច ដែលជនសង្ស័យដាក់នៅក្នុងមួកការពារ រួចក៏បញ្ជូនជនសង្ស័យ និងវត្ថុតាងមកអធិការដ្ឋាននគរបាលស្រុកដើម្បីកសាងសំណុំរឿងតាមនីតិវិធីតែ៕