ភ្នំពេញៈ ល្បែងកន្ទុយលេខឆ្នោតវៀតណាមស៊ីសងខុសច្បាប់ បំភាន់ភ្នែកសមត្ថកិច្ចជ្រកក្រោមស្លាកសញ្ញាយីហោ បោកអ៊ុត ត្រូវបានកម្លាំងអធិការដ្ឋាននគរបាលខណ្ឌឫស្សីកែវ សហការជាមួយនគរបាលប៉ុស្តិ៍គីឡូម៉ែត្រលេខ៦ ដឹកនាំដោយលោកអនុសេនីយ៍ត្រី ម៉ៅ ចាន់ថុន បានធ្វើការចុះបង្ក្រាប កាលពីវេលាម៉ោង ២រសៀល ថ្ងៃទី១៥ ខែមិថុនា ឆ្នាំ២០១៧នេះ ដែលស្ថិតចំណុចផ្ទះលេខ១៨៥H៥ ផ្លូវបេតុង ក្រុមទី១១ ភូមិក្រាលគោក សង្កាត់គីឡូម៉ែត្រលេខ៦ ខណ្ឌឫស្សីកែវ រាជធានីភ្នំពេញ។

លោក ម៉ៅ ចាន់ថុន បានឲ្យដឹងថា ជាលទ្ធផលក្នុងការចុះបង្ក្រាបនេះដែរ កម្លាំងសមត្ថកិច្ចយើងសហការជាមួយសមត្ថកិច្ចមូលដ្ឋាន និងមានការសម្របសម្រួលពីសំណាក់លោកស្រី វង្ស ប៊ុនវិសុទ្ធ ព្រះរាជអាជ្ញារងអមសាលាដំបូងរាជធានីភ្នំពេញ ហើយសមត្ថកិច្ចយើងបានបើកប្រតិបត្តិការស្រាវជ្រាវរហូតឈានដល់ការចុះបង្ក្រាបទីតាំងលួចជ្រកក្រោយស្លាកយីហោ បោកអ៊ុត ដោយសមត្ថកិច្ចយើងបានឃាត់ខ្លួនមនុស្សម្នាក់ និងដកហូតវត្ថុតាងមួយចំនួន។

លោក បានបន្តទៀតថា នៅក្នុងកិច្ចការប្រតិបត្តិការនេះ សមត្ថកិច្ចយើងបានឃាត់ខ្លួនជនសង្ស័យឈ្មោះ ស៊ីន ពិសីដ្ឋ ភេទប្រុស អាយុ ២៧ឆ្នាំ ជនជាតិខ្មែរ (ជាអ្នកកត់ឆ្នោត) ស្នាក់នៅទីតាំងកើតហេតុខាងលើ។ ចំណែកឯវត្ថុតាងដកហូតរួមមានៈ ក្រដាស់សម្រាប់កត់ឆ្នោតវៀតណាមមួយចំនួន, ត្រាសម្រាប់វាយថ្ងៃខែឆ្នាំចំនួន មួយ, ប៊ិចចំនួន ៤ដើម, ម៉ាស៊ីនគិតលេខចំនួនមួយ, សេរីចេញឆ្នោតមួយចំនួន និងប្រាក់មួយចំនួន។ ក្រោយពីធ្វើការឃាត់ខ្លួនជនសង្ស័យខាងលើរួចមក សមត្ថកិច្ចយើងបាននាំខ្លួនជនសង្ស័យទៅធ្វើការសាកសួរបន្ត។

បច្ចុប្បន្នជនសង្ស័យខាងលើ រួមជាមួយនឹងវត្ថុតាង ត្រូវសមត្ថកិច្ចឃុំខ្លួនជាបណ្តោះអាសន្ននៅអធិការដ្ឋាននគរបាលខណ្ឌឫស្សីកែវ ដើម្បីកសាងសំណុំរឿងចាត់ការបន្តតាមនីតិវិធីច្បាប់៕