Post News Media ព័ត៌មានជាតិ ខ្លាំងបាត់! ខ...

ខ្លាំងបាត់! ខឹងមិនឲ្យខ្ចីម៉ូតូ បែរជាយកដុំឥដ្ឋការ៉ូវាយក្បាលគេបែកឈាម

ភ្នំពេញ: ករណីហិង្សាមួយបានកើតឡើងទាំងកណ្ដាលយប់បង្កការភ្ញាក់ផ្អើល​ដល់​ប្រជាពល​រដ្ឋ​និង​សមត្ថកិច្ច​យ៉ាង​ខ្លាំង។

​ហេតុការណ៍ភ្ញាក់ផ្អើលនេះបានកើតឡើងកាល​ពី​វេលា​ម៉ោង​១០​និង​២០​នាទី​យប់ ថ្ងៃ​ទី​១៥ ខែ​មិថុនា ឆ្នាំ​២០១៧ នៅ​ប្រឆិត​ខាង​ត្បូង​វិទ្យា​ល័យ ជា ស៊ីមសាមគ្គី ប្រហែល​៥០​ម៉ែត្រ តាម​បណ្ដោយ​ផ្លូវ​២៧១ ស្ថិត​ក្នុង​ភូមិ​មាន​ជ័យ សង្កាត់​ស្ទឹង​មាន​ជ័យ ខណ្ឌ​មានជ័យ រាជធានី​ភ្នំពេញ។

ប្រភពពីសមត្ថកិច្ចបានឲ្យដឹងថា ជន​បង្ក​មាន​ឈ្មោះ អូ សីហា ភេទប្រុស អាយុ​២៤​ឆ្នាំ មុខ​របរ​នៅ​ផ្ទះ ស្នាក់​នៅក្បែរ​កន្លែង​កើត​ហេតុ ដោយ​ធ្លាប់​បែក​ថ្នាំ និង​ត្រូវ​ម្ដាយ​ចាប់​ដាក់​មណ្ឌល​កែ​ប្រែ​កន្លង​រួច​មក​ហើយ។ ចំណែក​យុវ​ជន​រងគ្រោះ​មាន​ឈ្មោះ រិន ចាន់ អាយុ​២៤ឆ្នាំ ​មុខ​របរ​កម្មករ​លើក​បន្លែ​ ស្នាក់​នៅ​ម្តុំ​ផ្សារ​ស្ទឹង​មានជ័យ​ សង្កាត់​ស្ទឹងមានជ័យ ខណ្ឌ​មានជ័យ និង​មាន​បង​ប្អូន​បក្ស​ពួក​ជន​រងគ្រោះ​មាន​២​នាក់ទៀត ទី​១​ឈ្មោះ​ សល់ សាម៉ុន ភេទ​ប្រុស អាយុ​២២​ឆ្នាំ មុខ​របរ​លក់​ដូរ​ចាប់​ហ៊ួយ ស្នាក់​នៅ​កន្លែង​កើត​ហេតុ​ខាង​លើ (ជា​អ្នក​កាន់​កាំបិត​និង​ដំបង​ជ្រុង) ទី​២​ឈ្មោះ ហួរ តាក់ ភេទ​ប្រុស អាយុ​២៥​ឆ្នាំ មុខ​របរ​កម្មករ​លើ​បន្លែ ស្នាក់​នៅ​សង្កាត់​ស្ទឹងមានជ័យ ខណ្ឌ​មានជ័យ។

បើ​តាម​សម្ដី​យុវជន​រងគ្រោះ​បាន​ប្រាប់​ឲ្យ​ដឹង​ថា នៅ​មុន​ពេលកើត​ហេតុ​ រូប​គេ​បាន​ជិះ​ម៉ូតូ​ម៉ាកសង់​កូរ៉េ ពណ៌​ក្រហម គ្មាន​ស្លាក​លេខ​មក​ពី​ផ្ទះ​ជួល បំណង​មក​យាម​ផ្ទះ​បង​ប្អូន​នៅ​កន្លែង​កើត​ហេតុ ពី​ព្រោះ​បង​ប្អូន​ដែល​ជា​ម្ចាស់​បន្ទប់​លក់​ចាប់​ហ៊ួយ បាន​ជាប់​រវល់ទៅ​កម្ម​វិធី​ជប់​លៀង ខណ:​ពេល​ដែល​ជន​រង​គ្រោះ​មក​ដល់​ផ្ទះ​បន្ទប់​បង​ប្អូន ស្រាប់​តែ​បន្ទប់​នោះ​បាន​ចាក់​សោរ​ជាប់​មិន​អាច​ចូល​បាន។ បន្ទាប់​មក​ជន​រងគ្រោះ​ក៏​បាន​អង្គុយ​លេង​នៅ​មុខ​បន្ទប់​ជា​កន្លែង​កើត​ហេតុ គ្រា​នោះ​ក៏​មាន​យុវជន​បង្ក​ឈ្មោះ អូ សីហា ដែល​ជន​រងគ្រោះ​មិន​ធ្លាប់​ស្គាល់​ពី​មុន​មក បាន​ដើរ​មក​ខ្ចី​ម៉ូតូ​ជិះ តែ​យុវ​ជន​រងគ្រោះ​មិន​ឲ្យ រួច​យុវ​ជន​បង្ក​ក៏​បាន​ដើរ​ចេញ​ទៅ​យក​ដុំ​ឥដ្ឋ​ការ៉ូ មក​វាយ​ក្បាល​យុវ​ជនរង​គ្រោះ​បណ្ដាល​ឲ្យ​បែក​ក្បាល​ចេញ​ឈាម រង​របួស​ស្រាល ភ្លាម​នោះ​យុវ​ជន​រងគ្រោះ​ក៏​បាន​ស្រែក​ឲ្យ​បង​ប្អូន​របស់​គាត់​នៅ​ក្បែរ​នោះ​ជួយ។ បន្ទាប់មក បក្ស​ពួក​យុវ​ជន​រងគ្រោះ​ខាង​លើ​បាន​ចេញ​មក​ហើយ​យក​កាំបិត​និង​ដំបង​ឈើ​ជ្រុង​រៀប​នឹង​កាប់​ចាក់​គ្នា តែ​ត្រូវ​បាន​ប្រជា​ពលរដ្ឋ​និង​សមត្ថកិច្ច​នគរបាល​ប៉ុស្ដិ៍​បឹង​សាឡាង​ចុះ​ជួយ​អន្តរាគមន៍ ដក​ហូត​កាំបិត​និង​ឈើ​ជ្រុង​ពី​បក្ស​ពួក​ជន​រងគ្រោះ​ទាន់​ពេល​វេលា។

ក្រោយពេលកើតហេតុ ​ប្រជាពលរដ្ឋនិងសមត្ថកិច្ចនគរបាលប៉ុស្ដិ៍បឹងសាឡាងបានទំនាក់​ទំនង​ទៅ​សមត្ថកិច្ច​មូល​ដ្ឋាន​ដែល​ជា​ម្ចាស់​ទឹក​ដី ឲ្យ​ចុះ​មក​ដឹក​យក​បក្ស​ពួក​ជន​រង​គ្រោះ រួម​ទាំង​ជន​បង្ក ទៅ​កាន់​ប៉ុស្ដិ៍​នគរបាល​រដ្ឋបាល​ស្ទឹង​មាន​ជ័យ ដើម្បី​សាក​សួរ​និង​កសាង​សំណុំ​រឿង​ចាត់​ការ​តាម​ផ្លូវ​ច្បាប់៕