បាត់ដំបង: ជនសង្ស័យ២នាក់ ត្រូវបានសមត្ថកិច្ចឃាត់ខ្លួន ក្រោយពីធ្វើសកម្មភាពចូលក្នុងផ្ទះប្រជាពលរដ្ឋលួចគាស់ចានបង្គន់ម៉ាក (Gusto Sanitary Aware)។ ហេតុការណ៍កើតឡើងនៅវេលាម៉ោង៧យប់ ថ្ងៃទី១៣ ខែមិថុនា ឆ្នាំ២០១៧ នៅចំណុចក្រុមទី១២ ភូមិអូរតាគាំ១ សង្កាត់ទួលតាឯក ក្រុងបាត់ដំបង។

ជនសង្ស័យទី១មានឈ្មោះ ទី វុត្ថា ហៅព្រីង ភេទប្រុស អាយុ២៨ ឆ្នាំ មុខរបរ មិនពិតប្រាកដ រស់នៅចំណុចកើតហេតុខាងលើ ។ រហូតដល់វេលាម៉ោង១២ និង៣០នាទី ថ្ងៃទី១៤ ខែមិថុនា ឆ្នាំ២០១៧ ក្រោយពីធ្វើការសាកសួរជនសង្ស័យខាងលើរួចមក កម្លាំងយើងបានបន្តធ្វើការឃាត់ខ្លួនជនសង្ស័យម្នាក់ទៀត ឈ្មោះ ព្រំ ប៊ុនធឿន ភេទប្រុស អាយុ៣៨ឆ្នាំ មុខរបរ មិនពិតប្រាកដ រស់នៅភូមិឃុំកើតហេតុខាងលើ។

ជនសង្ស័យទាំង២នាក់ខាងលើ បានធ្វើសកម្មភាពចូលក្នុងផ្ទះលួចគាស់ចានបង្គន់ម៉ាក (Gusto Sanitary Aware) របស់ជនរងគ្រោះឈ្មោះ ឆែម ចិន្តា ភេទស្រី អាយុ ៤៤ ឆ្នាំ មុខរបរ មេផ្ទះ រស់នៅភូមិកំពង់ក្របី សង្កាត់ស្វាយប៉ោ ក្រុងបាត់ដំបង ខេត្តបាត់ដំបង។

បច្ចុប្បន្នជនសង្ស័យ រួមនឹងវត្ថុតាងខាងលើ កំពុងកសាងសំណុំរឿងបញ្ជូនទៅសាលាដំបូងខេត្តបាត់ដំបង ចាត់ការតាមនីតិវិធីច្បាប់៕