Post News Media ព័ត៌មានសេដ្ឋកិច្ច ភ្នំពេញ នឹងបន...

ភ្នំពេញ នឹងបន្ថែមរថយន្តក្រុង ១០០គ្រឿង បើកខ្សែរត់ថ្មី ៥ខ្សែ នៅខែកក្កដា

សាលារាជធានីភ្នំពេញ នឹងបើកបន្ថែមខ្សែរត់រថយន្តក្រុងចំនួន ៥ខ្សែបន្ថែមទៀត បន្ទាប់ពីទទួលបានរថយន្តក្រុង ១០០គ្រឿងបន្ថែម​ ក្នុងខែកក្កដា ខាងមុខនេះ។ នេះបើយោងតាមការឲ្យដឹងពី គេហទំព័ររបស់លោក ម៉េត មាសភក្តី អ្នកនាំពាក្យសាលាក្រុងភ្នំពេញ។

បច្ចុប្បន្ន រថយន្តក្រុង កំពុងរត់លើខ្សែរត់ចំនួន ៣ ជារៀងរាល់ថ្ងៃ ហើយកំពុងសិក្សាសាកល្បងលើ ៥ខ្សែបន្ថែមទៀតរួមមាន៖

១.គីឡូម៉ែត្រលេខ ៩ ដល់ បឹងឈូក

២.ផ្សាររាត្រី ដល់ តាខ្មៅ

៣.ផ្សាររាត្រី ដល់ ចោមចៅ

៤.ចោមចៅ ដល់ វត្តស្លែង

៥.ផ្សារកណ្តាល ដល់ ស្ពានព្រះមុនីវង្ស

៦.គីឡូម៉ែត្រលេខ ៩ ដល់ ស្ពានព្រះមុនីវង្ស និងព្រែកលាប ដល់ សែនជូរីផ្លាហ្សា

៧.ស្តាតចាស់ ដល់ ស្ទឹងមានជ័យ

៨.ស្ទឹងមានជ័យ ដល់ វត្តស្លែង។

ការប្រើប្រាស់សេវាដឹកជញ្ជូនសាធារណ: ជាសកម្មភាពដ៏ល្អ ក្នុងការកាត់បន្ថយការកកស្ទះចរាចរណ៍ ក្នុងរាជធានីភ្នំពេញ ហើយកាលពីឆ្នាំ ២០១៦ រថយន្តក្រុងសាធារណ: បានបម្រើដល់អ្នកដំណើរជាង ២លាននាក់​។

សាលារាជធានីភ្នំពេញ នឹងបន្តខិតខំពង្រឹងការគ្រប់គ្រង ឲ្យមានប្រសិទ្ធភាព និងផ្តល់សេវាឲ្យបានល្អជាងនេះ ជាពិសេសគឺ ពង្រីកខ្សែរត់បន្ថែមឲ្យដល់ ១០ខ្សែ ដើម្បីផ្តល់ភាពងាយស្រួល សម្រាប់ការធ្វើដំណើររបស់ប្រជាពលរដ្ឋ ក៏ដូចជាភ្ញៀវទេសចរណ៍។

កាលពី ខែមីនាកន្លងទៅនេះ រដ្ឋាករស្វយ័តដឹកជញ្ជូនសាធារណ:រថយន្តក្រុង និងធនាគារឯកទេស វីង បានចុះហត្ថលេខាលើកិច្ចសន្យាស្តីពី ការរៀបចម្បង្កើតប្រព័ន្ធទូទាត់តាមអេឡិចត្រូនិចសម្រាប់ សេវារថយន្តក្រុងសាធារណ:រួចរាល់ហើយ។

ការប្រើកាតឆូត នៅពេលប្រើប្រាស់រថយន្តក្រុងសាធារណ: នឹងផ្លាស់ប្តូរពីការប្រើប្រាស់ថវិកាដោយផ្ទាល់ មកជាការប្រើប្រាស់កាតប្រចាំខែ ឬប្រចាំឆ្នាំ ដែលបង្កភាពងាយស្រួលដល់ ការគ្រប់គ្រងចំណូលឲ្យមានប្រសិទ្ធភាព។

គួររម្លឹកដែរថា ក្រសួងសាធារណការ នឹងដឹកជញ្ជូន ក៏កំពុងតែសិក្សាពីលទ្ធភាព ក្នុងការប្រើប្រាស់កាណូតសាធារណ: Public Water Bus ជាលើកដំបូងបង្អស់នៅកម្ពុជា ដែលអាចចាប់ផ្តើមរត់នៅឆ្នាំ ២០១៨ខាងមុខនេះ រវាងទីតាំង ព្រែកព្នៅ-ភ្នំពេញ-តាខ្មៅ៕