ព័ត៌មានជាតិ

តើវាសនាចោរវ័យក្មេងទៅជាយ៉ាងណា ក្រោយពីសមត្ថកិច្ចឃាត់ខ្លួន?

ភ្នំពេញ: កាលពីថ្ងៃទី១៤ ខែមិថុនា ឆ្នាំ២០១៧ វេលាម៉ោង២៣និង១៥យប់ កម្លាំងល្បាតមូលដ្ឋានអាវុធហត្ថខណ្ឌសែនសុខ នៃរាជធានីភ្នំពេញ បានបង្ក្រាប និងឃាត់ខ្លួនជនសង្ស័យ២នាក់ម្តាយកូន ពាក់ព័ន្ធករណី លួចប្រាក់ចំនួន ៤០០ដុល្លារ និងទូរសព្ទ Iphone5s មួយគ្រឿង។ ជនសង្ស័យ ឈ្មោះ ម.ស អាយុ១០ឆ្នាំ បានធ្វើសកម្មភាពលូកហោប៉ៅ លួចប្រាក់និងទូរសព្ទរបស់ជនរងគ្រោះឈ្មោះ គៀ សុវណ្ណធារី ភេទស្រី អាយុ ២៩ឆ្នាំ នៅចំណុចផ្សារបឹងបៃតង ភូមិច្រេស សង្កាត់ភ្នំពេញថ្មី ខណ្ឌសែនសុខ ហើយយកទៅប្រគល់ឲ្យម្តាយឈ្មោះ មោង ផៃ អាយុ៤៥ឆ្នាំ ក៏ត្រូវបាន សមត្ថកិច្ចអាវុធហត្ថខណ្ឌសែនសុខឃាត់បានភ្លាមៗ បញ្ជូនមកកាន់ទីបញ្ជាការកងរាជអាវុធហត្ថរាជធានីភ្នំពេញ។ ក្រោយការស៊ើបអង្កេតរបស់សមត្ថកិច្ច និងចម្លើយសារភាពរបស់ជនសង្ស័យកុមារា ម.ស អាយុ១០ឆ្នាំ បានបញ្ជាក់ថា ពិតជាបានសកម្មភាពលួចប្រាក់និងទូរសព្ទប្រាកដមែន ហើយធ្លាប់លួចប្រហែល១០ដងមកហើយ ក្នុងម្តងៗបានប្រាក់ប្រហែលជាង១០០ដុល្លារប្រគល់ឲ្យម្តាយ។

ដោយចោរវ័យក្មេងជាអនិតិជន លោកឧត្តមសេនីយ៍ឯក រ័ត្ន ស្រ៊ាង មេបញ្ជាការរងកងរាជអាវុធហត្ថលើផ្ទៃប្រទេស ជាមេបញ្ជាការកងរាជអាវុធហត្ថរាជធានីភ្នំពេញ បានធ្វើការទំនាក់ទំនងជាមួយលោក យូ សុភ័ក្រ ប្រធានមណ្ឌលកុមារកំព្រាភ្នំពេញថ្មី និងជាតំណាងមន្ទីរសង្គមកិច្ចរាជធានីភ្នំពេញ ឲ្យទទួលយកកុមារា ម.ស ទៅរស់នៅក្នុងមណ្ឌល ដើម្បីទទួលបានការមើលថែនិងរៀនសូត្រផងដែរ។ រីឯម្តាយកុមារា ម.ស នៅមានកូនតូចៗ៣នាក់ផ្សេងទៀតទុកចោល ឯខ្ទមលើបឹង ក្នុងខេត្តព្រៃវែង ដោយផ្ញើនឹងអ្នកជិតខាងជួយមើលថែ ឃើញដូច្នោះជនរងគ្រោះដែលបាត់ប្រាក់និងទូរសព្ទក៏សម្រេចចិត្ត មិនដាក់ពាក្យបណ្តឹង។

ដោយសណ្តានចិត្តមនុស្សធម៌ នៅថ្ងៃទី១៧ ខែមិថុនា ឆ្នាំ២០១៧ លោកឧត្តមសេនីយ៍ឯក រ័ត្ន ស្រ៊ាង បានចំណាយពេលវេលា ជួបណែនាំ ដល់គ្រួសារ កុមារា ម.ស ដែលមានបងប្អូន៦នាក់ និងម្តាយពោះម៉ាយម្នាក់ ឪពុកស្លាប់ចោលបាត់កាលពីឆ្នាំ២០១៣ ព្រោះគ្រោះថ្នាក់ចរាចរណ៍ខណ:ដើរឆ្លងផ្លូវនៅពេលយប់ មិនដឹងថាត្រូវឡានឬម៉ូតូបុក ស្លាប់លើផ្លូវម្នាក់ឯង។

ក្រោយពេលទទួលបានការណែនាំពី លោក ឧត្តមសេនីយ៍ឯក រ័ត្ន ស្រ៊ាង ម្តាយរបស់កុមារា ម.ស បានប្តេជ្ញាត្រឡប់ទៅរស់នៅ លើខ្ទមក្នុងខេត្តព្រៃវែងវិញ ដោយចាប់យកមុខរបរ ដើរបេះឈូក ដកព្រលឹតតាមបឹង កាត់ត្រកួន បេះស្លឹកបាស់និងបន្លែផ្សេងៗលក់ ដើម្បីចិញ្ចឹមជីវិត ឈប់លួច ឈប់សុំទាន ហើយប្រគល់កូនតូច៣នាក់អាយុ១០ឆ្នាំ, អាយុ៩ឆ្នាំ(ប្អូនស្រី), អាយុ៨ឆ្នាំ(ប្អូនស្រី) ឲ្យមណ្ឌលកុមាកំព្រាភ្នំពេញថ្មី ដើម្បីទទួលបានការមើលថែ និងចូលរៀន ទុកតែកូនប្រុសពៅមួយអាយុ៧ឆ្នាំ នៅជាមួយព្រោះមិនទាន់អាចរស់នៅឆ្ងាយបែកពីម្តាយបាន រីឯកូនប្រុសច្បងបច្ចុប្បន្ន ចេះរស់ដោយខ្លួនឯង ដោយបានទៅធ្វើការលាងឡានឲ្យគេ មួយខែទទួលបាន៧០ដុល្លារ និងកូនស្រីទី២នៅស៊ីឈ្នួលគេដាំបាយបោកខោអាវលាងចាន បានមួយខែ៥០ដុល្លារផងដែរ។

ជាចុងក្រោយ លោក ឧត្តមសេនីយ៍ឯក រ័ត្ន ស្រ៊ាង បានទទួលយកការប្តេជ្ញា របស់ម្តាយកុមារា ម.ស ដោយអនុញ្ញាតិឲ្យធ្វើកិច្ចសន្យា ត្រឡប់ទៅស្រុកវិញ ហើយលោក ព្រមទាំងបានជួយឧបត្ថម្ភ អង្ករ៣ការ៉ុង ទឹកសុទ្ធ២កេស ទឹកក្រូច២យួរ ទឹកត្រីទឹកស៊ីអ៊ីវ២យួរ និងថវិកា៥០ម៉ឺនរៀលផងដែរ ដើម្បីឲ្យម្តាយរបស់កុមារា ម.ស ដោះស្រាយជីវភាពបណ្តោះអាសន្ន ពេលត្រឡប់ទៅផ្ទះវិញ៕

មតិយោបល់