ព័ត៌មានជាតិ

សមត្ថកិច្ចឆ្មក់បង្ក្រាបទីតាំងល្បែងស៊ីសងខុសច្បាប់មួយកន្លែងក្នុងសង្កាត់ក្រាំងធ្នង់!

ភ្នំពេញ: សមត្ថកិច្ចប៉ុសិ៍ក្រាំងធ្នុងចុះប្រតិបត្តិការបង្ក្រាបករណីបើកល្បែងស៊ីសងខុសច្បាប់(ជល់មាន់) ឃាត់ខ្លួនបានជនសង្ស័យ៣នាក់រួមជាមួយវត្ថុតាង ។

ប្រតិបត្តិការនេះបានធ្វើឡើងនៅថ្ងៃទី១៨ ខែមិថុនា ឆ្នាំ២០១៧ ត្រង់ចំណុចដីឡូតិ៍គ្មានលេខ ផ្លូវបេតុង ភូមិក្រាំងអង្ក្រង សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ។

ប្រភពព័ត៌មានបានឲ្យដឹងថា ជនសង្ស័យទី១ឈ្មោះ ឡុង រតនា(ម្ចាស់ទីតាំង) ភេទប្រុស អាយុ២៨ឆ្នាំ ជនជាតិខ្មែរ មុខរបរមិនប្រាកដ ស្នាក់នៅដីឡូតិ៍គ្មានលេខ ផ្លូវបេតុង ភូមិក្រាំងអង្ក្រង សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ។ ទី២ឈ្មោះ សុខ គួង ភេទប្រុស អាយុ២៧ឆ្នាំ ជនជាតិខ្មែរ មុខរបរជាងផ្សារដែក ស្នាក់នៅផ្ទះជួល ផ្លូវបេតុង ភូមិទួលសង្កែ សង្កាត់ទួលសង្កែ និងទី៣ឈ្មោះ តុប ស៊ីគាណ ភេទប្រុស អាយុ៣៩ឆ្នាំ ជនជាតិខ្មែរ មុខរបរមិនពិតប្រាកដ ស្នាក់នៅផ្ទះសង់ថ្មី ផ្លូវបេតុង ខណ្ឌសែនសុខ រាជធានីភ្នំពេញ។
វត្ថុតាងចាប់យករួមមាន ប្រាក់រៀលចំនួន៥០ម៉ឺន មានជល់៥ក្បាល ខ្នាយដែក១កូន(៤) ជញ្ជីងប៉ុង១ ទ្រុងដែក៥ និងស្តុតមួយចំនួន។

ប្រភពដដែលបានបន្តថា មុនពេលកើតហេតុកម្លាំងជំនាញបានប្រាប់ថា នៅដីឡូតិ៍គ្មានលេខ ផ្លូវបេតុង ភូមិក្រាំងអង្ក្រង សង្កាត់ក្រាំងធ្នង់ មានការប្រមូលផ្ដុំលេងល្បែងស៊ីសងខុសច្បាប់(ភ្នាល់ជល់មាន់) បន្ទាប់មកដោយមានការបញ្ជាផ្ទាល់ពីលោកស្រី វ៉ា សក្តា ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញតាមទូរសព្ទ យើងបានបង្កើតក្រុមប្រតិបត្តិការចុះបង្ក្រាបជាក់ស្ដែងដល់កន្លែងកើតហេតុ ឃាត់ខ្លួនបានជនសង្ស័យ៣នាក់ ក្នុងនោះមានម្នាក់ជាម្ចាស់ទីតាំង រួមជាមួយវត្ថុតាងមួយចំនួន។

ក្រោយពេលកើតហេតុ កម្លាំងជំនាញបាននាំខ្លួនជនសង្ស័យទាំង៣នាក់មកសាកសួរដើម្បីកសាងសំណុំរឿងដោះស្រាយតាមនីតិវិធីច្បាប់៕

មតិយោបល់