កណ្តាល: ករណី គ្រោះថ្នាក់ចរាចរណ៍រវាងម៉ូតូ និងរថយន្ត បណ្តាលឲ្យមនុស្ស៣នាក់រងរបួសធ្ងន់។
កើតហេតុនៅវេលាម៉ោង១១ និង៤០នាទីយប់ រំលងអធ្រាត្រ ឈានចូលថ្ងៃទី១៨ ខែមិថុនា ឆ្នាំ២០១៧ ត្រង់ចំណុចកែងភ្លើងស្តុបក្រពើហា លើផ្លូវជាតិលេខ២ ភូមិក្រពើហា សង្កាត់ព្រែកឬស្សី ក្រុងតាខ្មៅ ខេត្តកណ្តាល។

បង្កឡើងដោយរថយន្តមួយគ្រឿង មិនស្គាល់ម៉ាក ពណ៌ខៀវ មិនស្គាល់ស្លាកលេខ អ្នកបើកបរមិនស្គាល់អត្តសញ្ញាណ (បើករថយន្តរត់គេចបាត់) បើកបរក្នុងទិសដៅពីត្បូងមកជើងរួចបត់ឆ្វេងឆ្លងផ្លូវទៅលិច ក៏បានបុកជាមួយម៉ូតូមួយគ្រឿង ម៉ាកហុងដាឌ្រីម សេ១២៥ ពណ៌ខ្មៅ ពាក់ស្លាកលេខ ភ្នំពេញ1CD-7747 (មិនពាក់មួកសុវត្ថិភាព) ជិះដោយឈ្មោះ ប៉ឺន ចាន់សុភារ៉ា ភេទប្រុស អាយុ៤៨ឆ្នាំ នៅភូមិព្រៃក្តួចឃុំឈើកាច់ ស្រុកបាភ្នំ ខេត្តព្រៃវែង(រងរបួសធ្ងន់)និងមានអ្នករួមដំណើរជាមួយចំនួន២នាក់ទៀត ប៉ុន្តែមិនទាន់ស្គាល់អត្តសញ្ញាណនៅឡើយក្នុងទិសដៅពីជើងទៅត្បូង។ អ្នករងរបួសទាំង៣នាក់ត្រូវបានរថយន្តស៊ីរ៉ែនរបស់អធិការដ្ឋាននគរបាលក្រុងតាខ្មៅដឹកបញ្ជូនទៅមន្ទីរពេទ្យជ័យជម្នះដើម្បីសង្រ្គោះ។

ចំពោះមធ្យោបាយដែលពាក់ព័ន្ធត្រូវបានយកមករក្សាទុកនៅអធិការដ្ឋានបណ្តោះអាសន្នដើម្បីចាត់ការតាមនិតិវិធី៕