ភ្នំពេញ: កម្លាំងនគរបាលខណ្ឌសែនសុខធ្វើការឃាត់ខ្លួនជនសង្ស័យប្រុសស្រី៣នាក់ ដកហូតថ្នាំញៀន១២តូចធំ។

ហេតុការណ៍ឃាត់ខ្លួននេះ បានធ្វើឡើងនៅវេលាម៉ោង១រសៀល ថ្ងៃទី១៩ ខែមិថុនា ឆ្នាំ២០១៧ នៅចំណុចភូមិបូរីកម្មករ សង្កាត់ទឹកថ្លា ខណ្ឌសែនសុខ រាជធានីភ្នំពេញ។

សមត្ថកិច្ចបានឲ្យដឹងថា ជនសង្ស័យទាំង៣នាក់នោះ ទី១មានឈ្មោះ ផង់ រស្មី ភេទប្រុស អាយុ១៧ឆ្នាំ មុខរបរមិនពិតប្រាកដ ស្នាក់នៅភូមិបូរីកម្មករ សង្កាត់ទឹកថ្លា ខណ្ឌសែនសុខ ,ទី២ ឈ្មោះ រិទ្ធិ ពិសិដ្ឋ ភេទប្រុស អាយុ២៧ឆ្នាំ មុខរបរមិនពិតប្រាកដ ស្នាក់នៅតាមវណ្តោយផ្លូវលេខ២៧១ សង្កាត់ទឹកល្អក់៣ ខណ្ឌទួលគោក និងទី៣ ឈ្មោះ ស្រី ច្រឹប ភេទស្រី អាយុ២៧ឆ្នាំ មុនរបរមិនពិតប្រាកដ ស្នាក់នៅមិនពិតប្រាកដ។

សមត្ថកិច្ចបន្តថា មុនឈានទៅឃាត់ខ្លួនមុខសញ្ញាជួញដូរគ្រឿងញៀនខុសច្បាប់ខាងលើ គឺក្រោយពីមានប្រជាពលរដ្ឋបានរាយការណ៍ថា នៅចំណុចនេះ មានក្រុមជនសង្ស័យកំពុងប្រមូលផ្តុំគ្នាប្រើប្រាស់នូវគ្រឿងញៀនខុសច្បាប់ ទើបនគរបាលប៉ុស្តិ៍ឆ្លងយោបល់ពីលោកវរសេនីយ៍ អធិការខណ្ឌ ចុះទៅបង្ក្រាបជាក់ស្តែងតែម្តង ដោយឃាត់ក្រុមខាងលើបានចំនួន៣នាក់ធ្វើការដកហូតថ្នាំញៀន១២កញ្ចាប់តូចធំ។

បច្ចុប្បន្នជនទាំង៣នាក់ខាងលើនេះ បានឃាត់ខ្លួនបណ្តោះអាសន្ននៅអធិការដ្ឋាននគរបាលខណ្ឌសែនសុខរង់ចាំបញ្ជូនទៅតាមនីតិវិធី៕