ព័ត៌មានជាតិ

បុរសម្នាក់ជួញដូរគ្រឿងញៀន សមត្ថកិច្ចរកឃើញ ត្រូវឃាត់ខ្លួន!

ភ្នំពេញ: ករណីឃាត់ខ្លួនជនសង្ស័យម្នាក់ពីបទជួញដូរដោយខុសច្បាប់នូវសារធាតុញៀនដែលប្រព្រឹត្តទៅនៅក្នុងមូលដ្ឋានសង្កាត់បឹងកក់ទី២ ខណ្ឌទួលគោក រាជធានីភ្នំពេញ។

ហេតុការណ៍នេះកើតឡើងនៅថ្ងៃទី១៩ ខែមិថុនា ឆ្នាំ២០១៧ វេលាម៉ោង១០និង១០នាទីយប់់ នៅចំណុចប្លុក រោងចក្រឆ្នាំង ក្រុមទី១០៥ ភូមិ២១ សង្កាត់បឹងកក់ទី២ ខណ្ឌទួលគោក រាជធានីភ្នំពេញ។

ជនសង្ស័យឈ្មោះ កែវ ថាន់ ភេទប្រុស អាយុ៥០ឆ្នាំ មុខរបរមិនពិតប្រាកដ ស្នាក់នៅមិនពិតប្រាកដ តាមបណ្តោយផ្លូវរថភ្លើង។

តាមប្រភពព័ត៌មានបានឱ្យដឹងថា នៅថ្ងៃកើតហេតុខាងលើ កម្លាំងនគរបាលផ្នែកប្រឆាំងគ្រឿងញៀននៃអធិការដ្ឋាននគរបាលខណ្ឌទួលគោកសហការជាមួយប៉ុស្តិ៍បឹងកក់ទី២ ប្រតិបត្តិការបង្ក្រាបករណី ជួញដូរដោយខុសច្បាប់នូវសារធាតុញៀន ដោយឃាត់ខ្លួនបុរសម្នាក់ពីបទជួញដូរខុសច្បាប់នូវសារធាតុញៀន​ ហើយវត្ថុតាងចាប់យកបានដូចជា ក្រាមពណ៌សថ្លាចំនួន៥កញ្ចប់តូច (សង្ស័យជាគ្រឿងញៀន)។

បច្ចុប្បន្នជនសង្ស័យកំពុងឃាត់ខ្លួនជាបណ្ដោះអាសន្ននៅអធិការដ្ឋាននគរបាលខណ្ឌទួលគោក ដើម្បីសាកសួរ កសាងសំណុំរឿង និងបញ្ជូនជនសង្ស័យទៅសាលាដំបូងរាជធានីភ្នំពេញ ដើម្បីចាត់ការទៅតាមផ្លូវច្បាប់៕

មតិយោបល់