ភ្នំពេញៈ បុរសម្នាក់ជិះម៉ូតូPCX ពណ៌ស មួយគ្រឿង ពាក់ស្លាកលេខ ភ្នំពេញ 1FL-5373 បានប៉ះដៃចង្កូតគ្នាជាមួយនឹងម៉ូតូមួយគ្រឿងទៀតមិនស្គាល់ម៉ាក ក៏បានដួលអូសចូលក្រោមរថយន្តហាយទ្បែនឌ័រ ពណ៌ទឹកមាស ពាក់ស្លាកលេខ ភ្នំពេញ 2W-7675 ដែលចតនៅនឹងចញ្ចើមផ្លូវបណ្តាលឲ្យរងការខូចខាតយ៉ាងដំណំ។

ហេតុការណ៍នេះកើតទ្បើងកាលពីវេលាម៉ោង ៦និង៥០នាទីយប់ថ្ងៃទី៤ ខែកញ្ញា ឆ្នាំ ២០១៧ ស្ថិតនៅតាមបណ្តោយផ្លូវសុធារស នៅខាងមុខ វត្តបុទុមវត្តី ស្ថិតក្នុងសង្កាត់ចតុមុខ ខណ្ឌដូនពេញ រាជធានីភ្នំពេញ ។

តាមប្រភពព័ត៌មានពីកន្លែងកើតហេតុបានឲ្យដឹងថា គេឃើញម៉ូតូPCX ពណ៌ស បើកបរដោយបុរសម្នាក់ ស្របពេលនោះ ស្រាប់តែមានម៉ូតូមួយគ្រឿងទៀត បើកក្នុងល្បឿនលឿន ទិសដៅពីជើងទៅត្បូង ស្របគ្នាមកប៉ះដៃចង្កូតបណ្តាលឲ្យបុរសម្នាក់ដែលជិះម៉ូតូPCX ដួលអូសម៉ូតូចូលក្រោមរថយន្តគេដែលកំពុងចតចោលនៅចញ្ចើមផ្លូវ របួសបន្តិចបន្តួច ចំណែករថយន្តហាយទ្បែនឌ័រវិញរងការខូចខាតផ្នែកខាងក្រោយរថយន្ត ។

ក្រោយពេលកើតហេតុសមត្ថកិច្ចជំនាញចរាចរណ៍ផ្លូវគោកខណ្ឌដូនពេញ បានចុះមកដល់កន្លែងកើតហេតុធ្វើការវាស់វែងនឹងរង់ចាំម្ចាស់រថយន្តហាយទ្បែនឌ័រដែលចតនៅនឹងចញ្ចើមផ្លូវ មកធ្វើការដោះស្រាយជាមួយនឹងម្ចាស់ម៉ូតូPCXតាមផ្លូវច្បាប់ ។