ភ្នំពេញ: អគ្គិភ័យមួយបានឆាបឆេះហាងលក់ទូសព្ទនិងអាផេតដែលមានយីហោiCase បង្កការភ្ញាក់ផ្អើលដល់បងប្អូនប្រជាពលរដ្ឋដែលនៅក្បែរកន្លែងកើតហេតុ នាំគ្នារាយការណ៍ទៅសមត្ថកិច្ចដើម្បីចុះមកអន្តរាគមន៍ភ្លាមៗ។

ហេតុការណ៍នេះបានកើតឡើងកាលពីវលាម៉ោង៨និង៣០នាទីយប់ថ្ងៃទី១៩ ខែមិថុនា ឆ្នាំ២០១៧ នៅចំណុចមុខសាលាបឋមសិក្សាសន្ធម៉ុក តាមបណ្តោយផ្លូវកម្ពុជាក្រោម សង្កាត់ទឹកល្អក់១ ខណ្ឌទួលគោក រាជធានីភ្នំពេញ។

ប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេបានឃើញមានផ្សែងហុយចេញពីបន្ទប់ជាន់ទី១ ភ្លាមនោះក៏បាននាំគ្នាភ្ញាក់ផ្អើលនិងរាយការណ៍ទៅសមត្ថកិច្ចដើម្បីអន្តរាគមន៍ហៅរថយន្តពន្លត់អគ្គិភ័យ របស់ស្នងការដ្ឋាននគរបាលរាជធានីភ្នំពេញ មកជួយអន្តរាគមន៍ចំនួន៣គ្រឿងបាញ់អស់ទឹកទាំងអស់ បន្ទាប់មកទៀត ក៏មានរថយន្តពន្លត់អគ្គិភ័យរថយន្តក្រុមហ៊ុនប្រេងឥន្ទន:សូគីមិចចំនួន១គ្រឿង និងអង្គភាពកងពល់តូច ង៧០ ចំនួន២គ្រឿងចុះមកដល់ផងដែរ តែមិនបានបាញ់នោះទេ ភ្លើងក៏រលត់ទៅវិញ។

ក្នុងហេតុការណ៍នេះដែរ សមត្ថកិច្ចបានឲ្យដឹងថា សម្ភារ:ដែលរងការខូចខាតនោះអស់ប្រហែល៥០% និងមិនមានគ្រោះថ្នាក់ដល់មនុស្សទេ។ ចំណែកមូលហេតុនោះបណ្តាលមកពីឆ្លងចរន្តអគ្គិសនីទើបបណ្តាលឲ្យមានការឆាបឆេះបែបនេះ ៕