ភ្នំពេញ: តាអាចារ្យវត្តអង្គនិស្ស័យម្នាក់ បើករថយន្ត មួយគ្រឿងលឿនដូចហោះ គេចនឹងរថយន្តដឹកកម្មរោងចក្រដែលកំពុងបើកបរបញ្ចា្រស់ទិសដៅគ្នា បានរ៉េចង្កូតធ្លាក់ផ្លូវក្រឡាប់ ៣ត្រឡប់បោកទៅលើបង្គោលភ្លើងបណ្តាលឲ្យរងការខូចខាតយ៉ាងដំណំ តែសំណាងល្អលោកតាអាចារ្យដែលជាអ្នកបើកបរនោះបានរបួសស្រាល ព្រោះមានសីលជាប់ខ្លួន។

ហេតុការណ៍គ្រោះថ្នាក់ចរចរណ៍នេះ បានកើតឡើងកាលពីវេលាម៉ោង ៦និង១៥នាទីព្រឹក ថ្ងៃទី២១ ខែមិថុនា ឆ្នាំ២០១៧ ដែលស្ថិតនៅចម្ងាយពីភូមិកន្លែងគល់ប្រហែល ៥០ម៉ែត្រតាមបណ្តោយផ្លូវលំ ភូមិកន្លែងគល់ សង្កាត់ពន្សាំង ខណ្ឌព្រែកព្នៅ រាជធានីភ្នំពេញ។

រថយន្តរងគ្រោះម៉ាក ហ៊ីយ៉ាន់ដាយ ពណ៌ទឹកប្រាក់ ពាក់ស្លាកលេខ ភ្នំពេញ 2AO-1309 រីឯអ្នកបើកបរត្រូវបានស្គាល់ឈ្មោះ វុន ចក់ ភេទប្រុស អាយុ ៦២ឆ្នាំ មានមុខរបរ តាអាចារ្យនៅវត្តអង្គនិស្ស័យ ដែលមានទីតាំងនៅក្នុងភូមិត្រពាំងអារ: សង្កាត់ឪឡោក ខណ្ឌពោធិ៍សែនជ័យ ស្នាក់នៅភូមិចំបក់ធំ សង្កាត់ពន្សាំង ខណ្ឌព្រែកព្នៅ បានរងរបួសស្រាល។ ចំណែឯករថយន្តដឹកកម្មក-កម្មការិនីពេញនោះមិនត្រូវបានស្គាល់ម៉ាកនោះទេ ពីព្រោះមិននៅកន្លែងកើតហេតុនោះឡើយ។

បើតាមប្រភពព័ត៌មានពីប្រជាពលរដ្ឋដែលរស់នៅក្បែរកន្លែងកើតហេតុបានប្រាប់ឲ្យដឹងថា នៅមុនពេលកើតហេតុ គេឃើញតាអាចារ្យបានបើករថយន្តម្នាក់ឯង ដោយជិះចេញពីវត្តគោលបំណងទៅផ្ទះតាមបណ្តោយផ្លូវលំ ក្នុងទិសដៅពីត្បូងទៅជើងក្នុងល្បឿនយ៉ាងលឿនដូចហោះ ខណ:ពេលបើកមកដល់ចំណុចកើតហេតុ ក៏មានរថយន្ត មួយគ្រឿងមិនចាំម៉ាកដឹកកម្មករ-កម្មការិនីពេញ ហើយរថយន្តតាអាចារ្យបានបួងចង្កូតជៀសមកខាងស្តាំដៃ ខណ:ពេលបើកជៀសរថយន្តដឹកកម្មករ-កម្មការិនីផុតបានបន្តិច ក៏បួងចង្កូតមកខាងឆ្វេងដៃ ហើយជាន់ហ្គែខ្លាំងពេកធ្វើអ្នកបើកបរស្លន់ស្លោក៏រ៉េចង្កូតធ្លាក់ចិញ្ចើមផ្លូវផ្នែកខាងឆ្វេងដៃក្រឡាប់ផ្កាប់ផ្ងារ ៣ត្រឡប់បោកទៅលើបង្គោលភ្លើងរងការខូចខាតយ៉ាដំណំតែសំណាងល្អលោកតាអាចារ្យមានសីលជាប់ខ្លួនរងរបួសស្រាល។

ក្រោយពីកើតហេតុ សមត្ថកិច្ចមូលដ្ឋានបានចុះទៅពិនិត្យនៅកន្លែង ក៏ប៉ុន្តែដោយសារតែរថយន្តខាងលើមិនបង្កហេតុប៉ះពាល់ដល់អ្នកធ្វើរដំណើរនៅតាមដងផ្លូវសាធាណ: ហើយក៏បានហៅម្ចាស់រថយន្តឲ្យហៅរថយន្តស្ទូចមកស្ទូចរថយន្តខាងលើយកទៅការាស់ដើម្បីជួសជុល៕