កំពង់ចាម: លោកអធិការរងស្រុកបាធាយ បានប្រាប់ Post News ថា មានករណីគ្រោះថ្នាក់ចរាចរណ៍មួយកើតឡើង រវាងរថយន្តសណ្តោងរម៉ក បើកសុខៗ ស្រាប់តែឈប់នៅចញ្ចើមផ្លូវ ត្រូវបានម៉ូតូមកពីក្រោយបុកពេញទំហឹង បណ្តាលឲ្យស្លាប់នៅនឹងកន្លែង។

ហេតុការណ៍កើតឡើងនៅវេលាម៉ោង៥ និង៥០នាទីព្រឹក ថ្ងៃទី២២ ខែមិថុនា ឆ្នាំ២០១៧ នៅលើផ្លូវជាតិលេខ ៦ ចំណុចមុខស្ថានីយ៍ថ្លឹងរថយន្តក្នុងភូមិជាលា ឃុំជាលា ស្រុកបាធាយ ខេត្តកំពងចាម។

មុនពេលកើតហេតុ គេឃើញរថយន្ត ១គ្រឿងម៉ាក FOZO សណ្ដោងរម៉ក ពណ៌ខៀវ ពាក់ស្លាកលេខ តាកែវ3A-0810 លេខសណ្ដោងរម៉ក ភ្នំពេញ4A-0617 អ្នកបើកបរបានរត់គេចខ្លួនបាត់ ដល់ចំណុចកើតហេតុខាងលើ បានឈប់នៅចិញ្ចើមផ្លូវ ដែលមានទិសដៅពីត្បូងទៅជើង ក៏ត្រូវបានម៉ូតូ១គ្រឿងម៉ាកហុងដា សេ១២៥ ពណ៌ខ្មៅ ពាក់ស្លាកលេខ ព្រៃវែង1J-3560 ជិះដោយឈ្មោះ ហេង យៀប ភេទប្រុស អាយុ ៤៩ឆ្នាំ ស្នាក់នៅភូមិព្រះតានេត ឃុំតាកោ ស្រុកស្វាយអន្ទរ ខេត្តព្រៃវែង ដែលមានទិសដៅពីត្បូងទៅជើង ដល់ចំណុចខាងលើបានបុកពីក្រោយរថយន្ត ដែលឈប់នៅចិញ្ចើមផ្លូវ ពេញទំហឹងបណ្តាលឲ្យស្លាប់នៅនឹងកន្លែង។

ក្រោយពីកើតហេតុ សមត្ថកិច្ចចុះទៅដល់កន្លែងកើតហេតុ ធ្វើការវាស់វែង និងកំណត់ហេតុ រួចនាំយកម៉ូតូនិងរថយន្តទាំង២គ្រឿងមករក្សាទុក រង់ចាំការដោះស្រាយគ្នាពេលក្រោយ។ ចំណែកសាកសព ត្រូវបានសមត្ថកិច្ចប្រគល់ជូនក្រុមគ្រួសារយកទៅធ្វើបុណ្យតាមប្រពៃណី៕