ឧត្ដរមានជ័យ: កម្លាំងនៃអធិការដ្ឋាននគរបាលស្រុកត្រពាំងប្រាសាទ បានចុះបង្ក្រាបករណីចែកចាយនិងប្រើប្រាស់នូវសារធាតុញៀនមួយករណី ឃាត់ខ្លួនបានជនសង្ស័យ២នាក់រួមជាមួយវត្ថុតាងមួយចំនួន។

ប្រតិបត្តិការនេះបានធ្វើឡើងនៅវេលាម៉ោង២និង២០នាទីរសៀល ថ្ងៃទី២៣ ខែមិថុនា ឆ្នាំ២០១៧ ត្រង់ចំណុចផ្ទះសំណាក់ ប្រាសាទមាស ឃុំត្រពាំងប្រាសាទ ស្រុកត្រពាំងប្រាសាទ ខេត្តឧត្ដរមានជ័យ។

ប្រភពព័ត៌មានបានឲ្យដឹងថា ជនសង្ស័យទី១ឈ្មោះ ផន ឧសភា ភេទប្រុស អាយុ២៥ឆ្នាំ រស់នៅភូមិត្រពាំងប្រាសាទ ឃុំត្រពាំងប្រាសាទ ស្រុកត្រពាំងប្រាសាទ ខេត្តឧត្ដរមានជ័យនិងទី២ឈ្មោះ ផូ ភា ភេទស្រី អាយុ២៤ឆ្នាំ រស់នៅភូមិកៀនកោះ ឃុំកៀនកោះ ស្រុកថ្មគោល ខេត្តបាត់ដំបង បច្ចុប្បន្នរស់នៅភូមិឃុំកើតហេតុខាងលើ។
វត្ថុតាងដកហូតយករួមមាន ថ្នាំញៀនប្រភេទម៉ាទឹកកក(lCE) ១កញ្ជប់តូចនិង២កញ្ជប់ធំល្មម ទូរសព្ទដៃ៤គ្រឿង អត្តសញ្ញាណប័ណ្ណ១សន្លឹក លុយខ្មែរ ៥០៦៣០០រៀល លុយបាត ៣៥០បាត លុយដុង ៨០២០០០ដុង ខ្សែលោហធាតុលឿង១ខ្សែ និងចិញ្ចៀនលោហធាតុលឿង ៤វង់។

បច្ចុប្បន្នជនសង្ស័យត្រូវបានសមត្ថកិច្ចនាំមកសាកសួរ ដើម្បីកសាងសុំណុំរឿងដោះស្រាយតាមនីតិវិធីច្បាប់៕