ព័ត៌មានជាតិ

ផ្អើលទាំងយប់! ខ្លាំងប៉ះខ្លាំង ទាស់ពាក្យសម្តីចុះប្រតាយប្រតប់គ្នា បែកមុខបែកមាត់

ភ្នំពេញ: ហិង្សាមួយបានកើតឡើងរវាងអ្នកបើករថយន្តតាក់ស៊ីម៉ែត្រក្រហម និងអ្នកបើកបររថយន្តតាក់ស៊ីម៉ែត្រក្រុមហ៊ុន VIP ឆយ ប្រតាយប្រតប់គ្នាទៅវិញទៅមក បណ្តាលឲ្យមានអ្នករងរបួសប៉ោងមុខនិងម្នាក់ទៀតរងរបួសដៃម្ខាង។

ហេតុការណ៍នេះបានបង្កឲ្យមានការភ្ញាក់ផ្អើលយ៉ាងខ្លាំងនៅវេលាម៉ោង១ និង១០នាទីយប់ រំលងអធ្រាត្រ ឈានចូលថ្ងៃទី២៦ ខែមិថុនា ឆ្នាំ២០១៧ តាមបណ្តោយផ្លូវលេខ១៨២ កែងនិងផ្លូវលេខ២៥៣ ស្ថិតក្នុងសង្កាត់ទឹកល្អក់៣ ខណ្ឌទួលគោក រាជធានីភ្នំពេញ ។

យោងតាមការបញ្ជាក់ពីបុរសដែលជាអ្នកបើករថយន្តតាក់ស៊ីម៉ែត្រក្រុមហ៊ុន VIP ឆយ បានឲ្យដឹងថា មុនពេលកើតហេតុ គាត់បានបើកបររថយន្តតាក់ស៊ីម៉ែត្រមួយគ្រឿង ពណ៌ស ដែលជារថយន្តរបស់ក្រុមហ៊ុន VIP ឆយ ពាក់ស្លាកលេខ ភ្នំពេញ2AA- 9439 ធ្វើដំណើរតាមបណ្តោយផ្លូវម៉ៅសេទុង ក្នុងទិសដៅពីត្បូងទៅជើង ខណដែលបើកមកដល់ស្តុបទេពផន គាត់បានបើករថយន្តបត់ទៅឆ្វេង ចូលតាមបណ្តោយផ្លូវលេខ១៨២វិញ ភ្លាមៗនោះ ក៏មានរថយន្តតាក់ស៊ីម៉ែត្រក្រហមមួយគ្រឿង ពាក់ស្លាកលេខ ភ្នំពេញ2AA- 5521 ធ្វើដំណើរបញ្រ្ចាសទិសគ្នា បើកមកត្រង់យ៉ាងលឿន មិនគោរពភ្លើងស្តុប បណ្តាលឲ្យបុរសបើករថយន្តតាក់ស៊ីម៉ែត្រ VIP ឆយ វាក់អើ ហើយក៏បើកកញ្ចក់រថយន្ត និយាយទៅកាន់អ្នកបើកបររថយន្តតាក់ស៊ីម៉ែត្រក្រហមថា«កុំបើកបររថយន្តចឹង គឺមិនត្រូវទេ» បុរសបើករថយន្តតាក់ស៊ីម៉ែត្រក្រុមហ៊ុន VIP ឆយ បន្ថែមទៀតថា គ្រាន់តែគាត់និយាយប៉ុណ្ណឹងសោះ បុរសដែលបើករថយន្តតាក់ស៊ីម៉ែត្រក្រហម ក៏មានការខឹងសំបារនិងគាត់ ហើយបានចុះពីលើរថយន្ត មកទាញគាត់ចេញពីរថយន្ត ហើយបានវាយគាត់ទៀត។

គាត់បន្តថា ដោយមិនដឹងធ្វើយ៉ាងម៉េច គាត់ក៏បានតបតដៃជាមួយបុរសដែលបើកបររថយន្តតាក់ស៊ីម៉ែត្រក្រហមវិញ ក៏បានប្រតាយប្រតប់គ្នាទៅវិញទៅមក បណ្តាលឲ្យបុរសដែលជាអ្នកបើករថយន្តតាក់ស៊ីម៉ែត្រក្រុមហ៊ុន VIP ឆយ រងរបួសដៃខាងឆ្វេងម្ខាង រីឯបុរសម្នាក់ទៀតដែលជាអ្នកបើករថយន្តតាក់ស៊ីម៉ែត្រក្រហម រងរបួសប៉ោងមុខប៉ោងមាត់ បង្កឲ្យមានការភ្ញាក់ផ្អើលយ៉ាងខ្លាំងម្តុំស្តុបក្បែរប៉ុស្តិ៍នគរបាល ទឹកល្អក់៣ ខណដែលកំពុងតែប្រតាយប្រតប់គ្នា។

បុរសបើកបររថយន្តតាក់ស៊ីម៉ែត្រក្រហមវិញ បានប្រាប់ថា មុនពេលកើតហេតុ គាត់បានបើករថយន្តតាក់ស៊ីម៉ែត្រក្រហមមួយ គ្រឿង ពាក់ស្លាកលេខ ភ្នំពេញ2AA- 5521 ដឹកភ្ញៀវម្នាក់ ខណ:ដែលបើកបរមកដល់ស្តុបទេពផន បានវាក់អើ ជាមួយរថយន្តតាក់ស៊ីម៉ែត្រមួយគ្រឿង ពណ៌ស ដែលជារថយន្តរបស់ក្រុមហ៊ុន VIP ឆយ ដែលមានពាក់ស្លាកលេខ ភ្នំពេញ2AA- 9439 ហើយមានការឈ្លោះប្រកែកគ្នាបន្តិចបន្តួចទៀតផង ហើយបុរសដែលបើករថយន្តតាក់ស៊ីម៉ែត្រក្រហម បានបត់រថយន្តមកស្តាំ ធ្វើដំណើរតាមបណ្តោយផ្លូវលេខ១៨២វិញម្តង ក្នុងទិសដៅពីកើតមកលិច លុះមកដល់កន្លែងកើតហេតុ កែងនិងផ្លូវលេខ២៥៣ នៅក្បែរប៉ុស្តិ៍នគរបាលទឹកល្អក់៣ បុរសដែលបើករថយន្តតាក់ស៊ីម៉ែត្រក្រុមហ៊ុន VIP ឆយ បានបើករថយន្តដេញតាមរថយន្តគាត់ពីក្រោយ ហើយបានចុះពីលើរថយន្ត មកវាយគ្នា បណ្តាលឲ្យគាត់ប៉ោងមុខប៉ោងមាត់ ហើយទូរសព្ទរបស់គាត់ ពេលដែលប្រតាយប្រតប់គ្នាជាមួយបុរសដែលបើករថយន្តតាក់ស៊ីម៉ែត្រក្រុមហ៊ុន VIP ឆយ រងការខូចខាតបែកកញ្ចក់ទូរសព្ទគាត់ទៀត ។

ក្រោយកើតហេតុភាគីទាំងសងខាងបានរត់ទៅឲ្យកម្លាំងរាជអាវុធខណ្ឌទួលគោក ដើម្បីធ្វើការដោះស្រាយគ្នាតាមផ្លូវច្បាស់ ព្រោះភាគីទាំងនិយាយយកត្រូវរៀងៗខ្លួន៕

មតិយោបល់