កណ្តាល: ល្បែងកត់កន្ទុយលេខយ៉ាងអនាធិបតេយ្យគ្មានញញើតសមត្ថកិច្ច កត់យ៉ាងសង្ហា ជាយូរណាស់មកហើយ ដោយយកទូរដូរលុយ ទូរលក់មាស បន្លំយកមកកត់កន្ទុយលេខជារៀងរាល់ថ្ងៃ ជាច្រើនកន្លែងទៀតផង។ អ្វីដែលគួរឲ្យហួសចិត្តនោះ គឺកន្លែងកត់កន្ទុយលេខមួយកន្លែងដែលកត់ចំហរ មិនលួចលាក់ យ៉ាងសង្ហានោះត្រូវបានគេស្គាល់ថាជាប្រពន្ធរបស់អនុសេនីយ៍ទោម្នាក់ ដែលមានតួនាទីជានាយរងផ្នែកព្រហ្មទណ្ឌនៃអធិការដ្ឋាននគរបាលក្រុងតាខ្មៅ ដែលជាអ្នកខាងចាប់គេ តែប្រពន្ធខ្លួនឯង ឲ្យប្រព្រឹត្តអំពើរល្មើសច្បាប់ទៅវិញ។

ទីតាំងកន្លែងកត់កន្ទុយលេខយ៉ាងអនាធិបតេយ្យនោះគឺនៅច្រកចូលរង្វង់មូលសេះស ក្នុងផ្សារតាខ្មៅចាស់ ស្ថិតក្នុងភូមិតាខ្មៅ សង្កាត់តាខ្មៅ ក្រុងតាខ្មៅ ខេត្តកណ្តាល។

ប្រភពព័ត៌មានច្បាស់ការបានប្រាប់ភ្នាក់ងារ Post News ថា នៅក្នុងផ្សារតាខ្មៅចាស់ គឺសម្បូរណាស់កន្លែងដែលលួចលាក់ ដាក់ទូរដូរលុយ ដាក់ទូរលក់មាស ដាក់តុកន្លែងផឹកទឹកអំពៅ ចោលដានភ្នែកសមត្ថកិច្ច តែទីបំផុតកន្លែងទាំងនោះសុទ្ធតែកន្លែងដែលក្រុមអ្នកញៀនល្បែងលួចកត់ លួចចាក់យ៉ាងសង្ហា សប្បាយអឺងកង។

ប្រភពព័ត៌មានបានប្រាប់បន្ថែមទៀតថា អ្វីដែលគួរឲ្យហួសចិត្តនោះ គឺកន្លែងកត់កន្ទុយលេខមួយកន្លែងដែលកត់ចំហរ មិនលួចលាក់ យ៉ាងសង្ហានោះ ត្រូវបានគេស្គាល់ថាជាប្រពន្ធរបស់អនុសេនីយ៍ទោម្នាក់ ដែលមានតួនាទីជានាយរងផ្នែកព្រហ្មទណ្ឌនៃអធិការដ្ឋាននគរបាលក្រុងតាខ្មៅថែមទៀតផង។

ប្រជាពលរដ្ឋនៅក្បែរទីតាំងនោះបានរិះគន់ខ្លាំងៗទៅលើលោកអនុសេនីយ៍ទោម្នាក់ ដែលមានតួនាទីជានាយរងផ្នែកព្រហ្មទណ្ឌក្រុងតាខ្មៅ ដែលបណ្តោយឲ្យប្រពន្ធរបស់ខ្លួនរកស៊ីមុខរបរខុសច្បាប់ ហើយខ្លួនឯងជាមន្ត្រីអនុវត្តច្បាប់ផងនោះ។

ប្រជាពលរដ្ឋបានសំណូមពរទៅលោក អ៊ាវ ចំរើន ស្នងការនគរបាលខេត្តកណ្តាល និងលោក ស៊ឹម ប៊ុតបណ្ឌឹត អធិការក្រុងតាខ្មៅ មេត្តាជួយបង្ក្រាបទីតាំងកន្លែងកត់កន្ទុយលេខនៅក្នុងផ្សារតាខ្មៅចាស់ផង និងជួយឲ្យមានវិធានការទៅលើនាយរងផ្នែកព្រហ្មទណ្ឌនៃអធិការក្រុងតាខ្មៅ ដែលខ្លួនឯងជាមន្ត្រីអនុវត្តច្បាប់ហើយប្រពន្ធរកស៊ីខុសច្បាប់ទៀត។

ជុំវិញរឿងរ៉ាវនោះដែរ លោកវរសេនីយ៍ ស៊ឹម ប៊ុតបណ្ឌឹត អធិការក្រុងតាខ្មៅ បានប្រាប់ភ្នាក់ងារ Post News ថា លោកនិងឲ្យកម្លាំងចុះទៅបង្ក្រាបនិងបញ្ឈប់ទីតាំងនោះភ្លាម៕