ប៉ៃលិនៈ ជនសង្ស័យប្រុសស្រីចំនួន២នាក់ ក្នុងនោះមានម្នាក់ជាបុគ្គលិកធ្វើការនៅក្រុមហ៊ុនកាស៊ីណូមួយកន្លែង ក្រោមការដឹកនាំ និងបញ្ជារផ្ទាល់ពីលោក ឧត្ដមសេនីយ៍ត្រី ជា ចាន់ឌិន ស្នងការនគរបាលខេត្តប៉ៃលិន កម្លាំងការិយាល័យជំនាញបានចុះធ្វើការបង្ក្រាបករណីជួញដូរ និងប្រើប្រាស់គ្រឿងញៀន មួយកន្លែងឃាត់ខ្លួនបានទាំង២នាក់នេះភ្លាមៗ ដកហូតបានថ្នាំញៀនជិត១០កញ្ចប់ឯណោះ។

ការបង្ក្រាបនេះបានធ្វើឡើងកាលពីវេលាម៉ោង៩និង៤០នាទី យប់ថ្ងៃទី២៧ ខែមិថុនា ឆ្នាំ២០១៧ ស្ថិតនៅចំណុចភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន។

ជនសង្ស័យទាំង២នាក់ដែលឃាត់ខ្លួនបានខាងលើនេះទី១មានឈ្មោះ សេង ផា ភេទប្រុស អាយុ២០ឆ្នាំ មុខរបរមិនពិតប្រាកដ និងជនសង្ស័យទី២ឈ្មោះ និច ធីតា ភេទស្រី អាយុ១៨ឆ្នាំ មុខរបរបុគ្គលិកកាស៊ីណូ។

ក្នុងនោះសមត្ថកិច្ចបានធ្វើការ ដកហូតនូវវត្ថុតាង ICE ចំនួន៩កញ្ចប់តូច ស្មើនឹង ២,៣៨ក្រាម ថ្លឹងទាំងថង់ផងដែរ ហើយបច្ចុប្បន្នជនសង្ស័យទាំង២នាក់ រួមនិងវត្ថុតាង ត្រូវបានសមត្ថកិច្ចជំនាញកសាងសំណុំរឿងដើម្បីចាត់ការតាមនិតិវិធីច្បាប់៕