ភ្នំពេញ: ហេតុការណ៍ភ្ញាក់ផ្អើលមួយបានកើតឡើង ដោយមានក្រុមចោរជិះម៉ូតូដេញតាមពីក្រោយ រួចធ្វើសកម្មភាពឆក់កាបូបបានសម្រេច បណ្តាលឲ្យស្ត្រីរងគ្រោះដួលបោកទៅលើដងផ្លូវពេញទំហឹង រងរបួសធ្ងន់ រួចប្រញាប់ជិះម៉ូតូគេចខ្លួនបាត់ស្រមោល។

ករណីនេះបានកើតឡើងកាលពីវេលាម៉ោង ១០និង៣០នាទីយប់ ថ្ងៃទី២៧ ខែមិថុនា ឆ្នាំ២០១៧ ស្ថិតនៅតាមបណ្តោយមហាវិថីសហព័ន្ធរុស្ស៊ី ក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ។

តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គេបានឃើញស្រ្តីម្នាក់ជិះម៉ូតូមួយគ្រឿងម៉ាក ឃ្លីក ពណ៌ស ពាក់ស្លាកលេខ សៀមរាប 1H-0006 ធ្វើដំណើរតែម្នាក់ឯងតាមបណ្តោយមហាវិថីសហព័ន្ធរុស្ស៊ីក្នុងទិសដៅពីកើតមកលិច លុះមកដល់កន្លែងកើតហេតុ ក៏មានក្រុមជនសង្ស័យ បានជិះម៉ូតូដេញតាមស្រ្តីរងគ្រោះពីក្រោយយ៉ាងលឿន រួចធ្វើសកម្មភាពឆក់កាបូបពីស្រ្តីរងគ្រោះ បណ្តាលឲ្យស្រ្តីរងគ្រោះរួមនឹងម៉ូតូដួលបោកក្បាលនឹងថ្នល់ រងរបួសធ្ងន់ធ្ងរ ត្រូវបានរថយន្តសាមុយដឹកបញ្ជូនទៅមន្ទីរពេទ្យធ្វើការសង្រ្គោះបន្ទាន់ភ្លាមៗតែម្តង ។ចំណែកក្រុមចោរឆក់បានជិះម៉ូតូរត់គេចខ្លួនដោយសុវត្ថិភាព ។ ចំណែកម៉ូតូត្រូវបានសមត្ថកិច្ចយកទៅរក្សាទុកនៅប៉ុស្តិ៍នគរបាលទឹកថ្លាដើម្បីរង់ចាំក្រុមគ្រួសារស្រ្តីរងគ្រោះ មកទទួលយកទៅវិញផងដែរ៕