កោះកុង: ករណីគ្រោះថ្នាក់ចរាចរណ៍ដ៏រន្ធត់មួយបានកើតឡើង ក្រោយពីរថយន្ត១គ្រឿងបុកម៉ូតូពេញទំហឹង បណ្តាលឲ្យបុរសម្នាក់ស្លាប់នៅនឹងកន្លែង។

ហេតុការណ៍កើតឡើងនៅវេលាម៉ោង ២រសៀល ថ្ងៃទី២៧ ខែមិថុនា ឆ្នាំ២០១៧ នៅចំណុចបត់កាត ក្នុងភូមិពាមកាយ ឃុំកោះស្តេច ស្រុកគីរីសាគរ ខេត្តកោះកុង ។
សមត្ថកិច្ចបានឲ្យដឹងថា ជនរងគ្រោះមានឈ្មោះ អួន យី ភេទប្រុស អាយុ៥៩ឆ្នាំស្នាក់នៅភូមិចម្លងគោ ឃុំថ្មស ស្រុកបទុមសាគរ ខេត្តកោះកុង។

តាមប្រភពព័ត៌មានពីកន្លែងកើតហេតុឲ្យដឹងថា មុនពេលកើតហេតុ គេឃើញរថយន្តម៉ាក នីសាន់ ពណ៌ ស ពាក់ស្លាកលេខ ភ្នំពេញ2V-1137 បើកពីកើតទៅលិច ដោយឈ្មោះ លូ ភឹង ភេទប្រុស អាយុ២៦ឆ្នាំ ជនជាតិចិន(គ្មានប័ណ្ណឆ្លងដែននិងប័ណ្ណបើកបរនោះទេ)មុខរបរ ក្រុមហ៊ុនញូញៀន លុះមកដល់កន្លែងកើតហេតុ បុកម៉ូតូ ម៉ាក វ៉េវអាល់ហ្វា ពណ៌ខ្មៅ គ្មានស្លាកលេខ ពីត្បូងទៅជើង បណ្តាលឲ្យស្លាប់នៅនឹងកន្លែងតែម្តង។

ក្រោយពេលកើតហេតុ សមត្ថកិច្ចបានចុះទៅដល់កន្លែងកើតហេតុ ធ្វើការវាស់វែងនឹងនាំយកម៉ូតូនិងរថយន្តមករក្សាទុកនៅអធិការដ្ឋាននគរបាលស្រុកគិរីសាគរ រង់ចាំការដោះស្រាយគ្នាពេលក្រោយ។ ចំណែកសាកសពជនរងគ្រោះ ត្រូវបានសមត្ថកិច្ចប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី៕