កណ្តាល: ករណីគ្រោះថ្នាកចរាចរណ៍ បង្កឡើងរវាងរថយន្ត និងម៉ូតូ បណ្តាលឲ្យ ស្រ្តីម្នាក់ស្លាប់នៅនឹងកន្លែងកើតហេតុ។

ហេតុការណ៍នេះបានកើតឡើងនៅវេលាម៉ោង១ និង៤០នាទីរសៀល ថ្ងៃទី២៩ ខែមិថុនា ឆ្នាំ២០១៧ នៅចំណុចលើកំណាត់ផ្លូវជាតិលេខ៥ ចន្លោះគីឡូម៉ែត្រលេខ ១៩-២០ ក្នុងភូមិសាស្ត្រភូមិពោធិ៍មង្គល ឃុំព្រែកតាទែន ឃុំព្រែកតាទែន ស្រុកពញាឮ ខេត្តកណ្តាល។

សមត្ថកិច្ចបានឲ្យដឹងថា ជនរងគ្រោះឈ្មោះ វ៉ាន់ ស៊ីនួន ភេទស្រី អាយុ៥៨ឆ្នាំ ស្នាក់នៅភូមិឃុំកើតហេតុខាងលើ។

ប្រភពព័ត៌មានពីកន្លែងកើតហេតុ គេឃើញរថយន្តបង្កម៉ាក វីហ្គូ ពណ៌ទឹកមាស ពក់ស្លាកលេខ ភ្នំពេញ2R-3281 បើកបរដោយឈ្មោះ វ៉ាន់ បូម៉ាត់សាលី ភេទប្រុស អាយុ២៦ឆ្នាំ ស្នាក់នៅភូមិអន្លុងត្នោត ឃុំលង្វែក ស្រុកកំពង់ត្រឡាច ខេត្តកំពង់ឆ្នាំង លុះមកដល់កន្លែងកើតហេតុ បានបុកម៉ូតូពេញទំហឹង បណ្តាលឲ្យស្រ្តីអ្នកជិះម៉ូតូស្លាប់នៅនឹងកន្លែងតែម្តង។

ក្រោយពេលកើតហេតុ សមត្ថកិច្ចបានចុះមកដល់កន្លែងកើតហេតុ នឹងនាំយកមធ្យោបាយពាក់ព័ន្ធ មករក្សាទុកនៅអធិការដ្ឋាននគរបាលស្រុកដើម្បីធ្វើការដោះស្រាយតាមនីតិវិធី។ ចំពោះសាកសព ត្រូវបានប្រគល់ជូនក្រុមគ្រួសារធ្វើបុណ្យតាមប្រពៃណី៕