ភ្នំពេញៈ ហេតុការណ៍ភ្ញាក់ផ្អើលមួយបានកើតឡើង បន្ទាប់ពីមានក្មេងសិស្សសាលាមួយក្រុម បានទាស់សម្តីគ្នាមួយប្រ៉ាវខណៈកំពុងលេងបាល់ រួចទៅផ្ទះរៀងខ្លួន លុះរំលងបានមួយថ្ងៃស្រាប់តែចងគំនុំលើកគ្នាមកវាយគេដល់ផ្ទះបណ្តាលឥ្យយុវជនម្នាក់បែកក្បាលដេរ៧ថ្នេរ ចំណែកជនបង្កត្រូវសមត្ថកិច្ចឃាត់ខ្លួនបាន។

ការឈ្លោះគ្នានេះបានកើតឡើងកាលពីរសៀលថ្ងៃទី២៨ ខែមិថុនា ឆ្នាំ២០១៧ ស្ថិតនៅក្នុងភូមិព្រៃពីងខាងត្បូង សង្កាត់ចោមចៅ ខណ្ឌពោធិ៍សែនជ័យ លុះវេលាម៉ោង១១ព្រឹក ថ្ងៃទី២៩ ខែមិថុនា ឆ្នាំ២០១៧ ស្រាប់តែភាគីម្ខាងទៀតបានហៅបក្ខពួកឲ្យទៅស្ទាក់វាយ បណ្តាលឲ្យរបួសដេ៧ថ្នេរ ទើបរត់មកប្តឹងសមត្ថកិច្ចប៉ុស្តិ៍ចោមចៅជួយអន្តរាគមន៍។

សមត្ថកិច្ចបានឲ្យដឹងថា ជនរងគ្រោះដែលត្រូវគេវាយបណ្តាលឲ្យរបួសខាងលើនេះមានឈ្មោះ ម៉េង ធា ភេទប្រុស អាយុ១៤ឆ្នាំ មុខរបរជាងកាត់កញ្ចក់ ស្នាក់នៅភូមិព្រៃព្រីងខាងត្បូង សង្កាត់ចោមចៅ ខណ្ឌពោធិ៍សែនជ័យ រងរបួសបែកក្បាលដេចំនួន៧ថ្នេរ។ ចំណែកឯគូទំនាស់មានឈ្មោះ សំ សំណាង ភេទប្រុស អាយុ១៣ឆ្នាំ ជាសិស្សថ្នាក់ទី៨ នៃវិទ្យាល័យជម្ពូវ័ន។

ក្នុងនោះដែរ បើយោងតាមសម្តីរបស់ជនរងគ្រោះឈ្មោះ ម៉េង ធា បានឲ្យដឹងថា នៅមុនពេលកើតហេតុ កាលពីថ្ងៃទី២៨ ខែមិថុនា ឆ្នាំ២០១៧ រូបគេបានទៅលេងបាល់នៅជិះផ្ទះ ខណៈកំពុងលេងស្រាប់តែមានយុវជនម្នាក់ មកប្រាប់ថាឈ្មោះ សំ សំណាងបានបបួលឯងវាយគ្នាតើឯងហ៊ានអត់? ពេលនោះរូបគេក៏ឆ្លើយថាហ៊ាន ក្រោយមកស្រាប់តែយុវជននោះ បានទៅសួរឈ្មោះ សំ សំណាងម្តងថា ឈ្មោះ ម៉េង ធា បបួលឯងវាយគ្នាតើឯងហ៊ានអត់? ពេលនោះឈ្មោះ សំ សំណាង ក៏ឆ្លើយថាហ៊ាន ក្រោយមកពួកគេក៏ឌឺដងដាក់គ្នា និងជេគ្នាមួយប្រ៉ាវតែមិនបានវាយគ្នាទេ។

លុះដល់វេលាម៉ោង១១ថ្ងៃទី២៩កើតហេតុ ខណៈឈ្មោះ ម៉េង ធា បានជិះម៉ូតូម្នាក់ឯងមកពីធ្វើការវិញបំណងទៅផ្ទះស្រាប់តែយុវជនមួយក្រុមដែលមិនដែលមានរឿងនឹងគ្នាសោះមកស្ទាក់វាយបណ្តាលឲ្យរបួសដេ៧ថ្នេរ ហើយក្រុមបង្កបានជិះម៉ូតូគេចខ្លួនបាត់។

ក្រោយកើតហេតុ ជនរងគ្រោះត្រូវបានម្តាយដឹកយកទៅមន្ទីរពេទ្យរួចហៅឈ្មោះសំ សំណាង មកប៉ុស្តិ៍នគរបាលដើម្បីសាកសួនិងដាក់ពាក្យបណ្តឹងក្រុមជនបង្ក។ ជាក់ស្តែងនៅចំពោះមុខសមត្ថកិច្ច ជនបង្ក បានសារភាពថាខ្លួនមានទំនាស់គ្នាជាមួយជនរងគ្រោះមែន តែរូបគេមិនបានវាយជនរងគ្រោះនោះទេ តែទោះជាយ៉ាងណា សមត្ថកិច្ចកំពុងស្រាវជ្រាវរកជនល្មើសខាងលើ ដើម្បីរកខុសត្រូវឲ្យជនរងគ្រោះផងដែរ៕

https://youtu.be/DUi56Vz7bWQ