ភ្នំពេញ:ជនសង្ស័យជាអ្នកសារព័ត៌មានរបស់អង្គភាព«ការពិត» ត្រូវបានសមត្ថកិច្ចនគរបាលខណ្ឌទួលគោក ធ្វើការឃាត់ខ្លួនក្រោយពីត្រួតពិនិត្យរកឃើញថ្នាំញៀនជាច្រើនកញ្ចប់ រួមនឹងវត្ថុតាងមួយចំនួនពាក់ពន្ធ័នឹងករណីជួញដូរគ្រឿងញៀន។

ប្រតិបត្តិការនេះបានធ្វើឡើងកាលពីវេលាម៉ោង៩និង១០នាទី ព្រឹកថ្ងៃទី២៩ ខែមិថុនា ឆ្នាំ២០១៧ ស្ថិតនៅចំណុចមុខដីឡូតិ៍លេខ៥ ផ្លូវលេខ២៧១ ក្រុមទី២៣ ភូមិ៧ សង្កាត់ទឹកល្អក់ទី១ ខណ្ឌទួលគោក រាជធានីភ្នំពេញ។

សមត្ថកិច្ចបានឲ្យដឹងថាជនសង្ស័យដែលឃាត់ខ្លួនបានខាងលើនេះមានឈ្មោះ ឃុន សី ហៅឌី ភេទប្រុស អាយុ៥១ឆ្នាំ មុខរបរប្រធានការិយាល័យសារព័ត៌មាន«ការពិត»ប្រចាំរាជធានីភ្នំពេញ ស្នាក់នៅផ្ទះជួលចល័ត ក្នុងភូមិត្រពាំងឈូក ផ្លូវលេខ២៧១ សង្កាត់ទឹកថ្លា ខណ្ឌសែនសុខ។ ក្នុងនោះដែរ សមត្ថកិច្ចបានធ្វើការដលហូតនូវវត្ថុតាងមួយចំនួនរួមមានដូចជា៖ ក្រាមពណ៌សថ្លា ចំនួន៧កញ្ចប់ (ក្នុងនោះតូច៦កញ្ចប់ និងធំ១កញ្ចប់),ដបកែច្នៃ ជាឧបករណ៍ប្រើប្រាស់គ្រឿងញៀន១,ប្រាក់ដុល្លារ សង្ស័យក្លែងក្លាយ ចំនួន ៣២៥ដុល្លារ ដែលមានក្រដាសប្រភេទ១០ដុល្លារចំនួន៣០សន្លឹក ក្រដាស២០ដុល្លារ១សន្លឹក និងក្រដាស៥ដុល្លារ ចំនួន១សន្លឹក,ប្រាក់បាតថៃ ចំនួន ៥.០០០B ដែលជាប្រភេទក្រដាស ៥០០បាត ចំនួន១០សន្លឹក,ប័ណ្ណព័ត៌មានការពិត លេខ 091-18 ចុះថ្ងៃទី០៣-០២ -២០១៧ ដែលមានឈ្មោះ ឃុន សី ចំនួន១សន្លឹក ។

មុននឹងឈានដល់ការឃាត់ខ្លួនបានជនសង្ស័យជាអ្នកសារព័ត៌មានខាងលើ គឺមុនដំបូងឡើយគេបានឃើញជនសង្ស័យមានទំនាស់គ្នាជាមួយអ្នករត់ម៉ូតូឌុប នៅចំណុចមុខដីឡូតិ៍លេខ៥ ត្រង់ចំណុចកើតហេតុ ខណ:នោះត្រូវបានកម្លាំងសមត្ថកិច្ចនគរបាលខណ្ឌទួលគោកកំពុងល្បាតបានឃើញក៏បានអន្តរាគមន៍សួរនាំ ស្រាប់តែជនសង្ស័យបានព្យាយាមយកកញ្ចប់បារីបោះចោល តែត្រូវសមត្ថកិច្ចរើសកញ្ចប់បារីនោះមកពិនិត្យក៏ឃើញសុទ្ធតែក្រដាសប្រាក់ក្លែងក្លាយ រួចបន្តពិនិត្យក្នុងកាបូបដែលជនសង្ស័យកំពុងស្ពាយ ឃើញមានក្រាមពណ៌សថ្លា និងឧបករណ៍សម្រាប់ប្រើប្រាស់គ្រឿងញៀនទើបធ្វើការឃាត់ខ្លួនជនសង្ស័យរូបនេះតែម្តង។

បច្ចុប្បន្នជនសង្ស័យជាអ្នកសារព័ត៌មានខាងលើ រួមនឹងវត្ថុតាងត្រូវបានសមត្ថកិច្ចធ្វើការសាកសួរនិងកសាងសំណុំរឿងបញ្ជូនខ្លួនទៅកាន់តុលាការចាត់ការនិងផ្តន្ទាទោសតាមផ្លូវច្បាប់បន្តទៀត៕