ភ្នំពេញៈ ជនសង្ស័យម្នាក់ ត្រូវបានកម្លាំងនគរបាលយុត្តិធម៌នៃអធិការដ្ឋាននគរបាលខណ្ឌទួលគោក ឃាត់ខ្លួនជាក់ស្តែង បន្ទាប់ជនសង្ស័យធ្វើសកម្មភាពលួចម៉ូតូនៅក្នុងមូលដ្ឋានសង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ កាលពីថ្ងៃទី១ខែកក្កដា ឆ្នាំ២០១៧។

ហេតុការណ៍ឃាត់ខ្លួនខាងលើនេះបានកើតឡើងកាលពីវេលាម៉ោង៩និង៣០ព្រឹកថ្ងៃទី២ ខែកក្កដា ឆ្នាំ២០១៧ ស្ថិតនៅចំណុចផ្លូវលេខ២៦១ កែងផ្លូវលេខ១៤៦ ក្រុម ទី២៩ ភូមិ១០ សង្កាត់ទឹកល្អក់ទី២ ខណ្ឌទួលគោក រាជធានីភ្នំពេញ ។

សមត្ថកិច្ចបានឲ្យដឹងថា ជនសង្ស័យខាងលើមានឈ្មោះ ព្រឹម សត្យា ហៅត្យា ភេទប្រុស អាយុ២២ឆ្នាំ មុខរបរពុំពិតប្រាកដ ស្នាក់នៅផ្ទះជួល ភូមិគោកឃ្លាង សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។

ចំណែកជនរងគ្រោះមានឈ្មោះ មី ចក់ ភេទប្រុស អាយុ៤២ឆ្នាំ មុខរបរ លក់ដូរ ស្នាក់នៅផ្ទះគ្មានលេខ ផ្លូវបេតុង ភូមិក្រាំងអង្ក្រង សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ ។

ចំពោះវត្ថុតាងដែលបានចាប់យក បានមាន៖ ម៉ូតូមួយគ្រឿងម៉ាក Honda C125 ពណ៌ខ្មៅ ស៊េរី២០១១ ពាក់ស្លាកលេខ ភ្នំពេញ 1AV-5060( ជាម៉ូតូជនរងគ្រោះ )។

ប្រភពព័ត៌មានពីនគរបាលបានឲ្យដឹងថា នៅមុនពេលកើតហេតុកម្លាំងផ្នែកនគរបាលយុត្តិធម៌ នៃអធិការដ្ឋាននគរបាល ខណ្ឌទួលគោក បានល្បាតការពារសុវត្ថិភាពនៅក្នុងមូលដ្ឋាន បានប្រទះឃើញជនសង្ស័យកំពុងជិះម៉ូតូជន រងគ្រោះសមត្ថកិច្ចបានអន្តរាគមន៍ឃាត់ជាក់ស្តែងតែម្តង ។

ក្រោយពេលឃាត់ខ្លួនដោយសារករណីខាងលើដែលកើតនៅទឹកដីសង្កាត់ក្រាំងធ្នង់សមត្ថកិច្ចខណ្ឌទួលគោក ក៏ប្រគល់ជនសង្ស័យ និង វត្ថុតាងឲ្យសមត្ថកិច្ចនគរបាលប៉ុស្តិ៍រដ្ឋបាលក្រាំងធ្នង់ ខណ្ឌសែនសុខ ដើម្បីចាត់ការបន្តតាមផ្លូវច្បាប់ ៕

https://youtu.be/Kg3De9z5XLo