ក្រោយពីលក់ Deulofeu កាលពីឆ្នាំ ២០១៥ កន្លងមក ក្រុមអ្នកមានបុណ្យ Barcelona បានសម្រេខចិត្តនាំយកកីឡាករស្លាបរូបនេះត្រឡប់មកវិញ នៅក្នុងរដូវកាលដោះដូរខាងមុខនេះ។

Gerard Deulofeu កំពុងតែបង្ហាញសមត្ថភាពយ៉ាងល្អ ថ្វីបើមិនអាចជួយអេស្ប៉ាញឲ្យឈ្នះពាន Euro U-21 ក៍ដោយ តែកីឡាកររូបនេះ ទទួលបានការចាប់អារម្មណ៍ឡើងវិញពីសំណាក់ក្លិប Barcelona។ Deulofeu ត្រូវបានក្រុម Barcelona លក់ទៅឲ្យក្រុម Everton កាលពីឆ្នាំ ២០១៥ កន្លងមកក្នុងតម្លៃខ្លួន ៤,៣លានផោន ដោយបានបង្ហាញខ្លួនឲ្យ Everton បាន ៣៦ប្រកួតស៊ុតបាន ៨គ្រាប់ មុននឹងត្រូវខ្ចីជើងទៅ AC Milan កាលពីខែមករា កន្លងមកនេះ។ យ៉ាងណាវិញ ក្លិប Barcelona មានបំណងចង់បានខ្សែបម្រើស្លាបរូបនេះត្រឡប់មកវិញ ខណះក្លិបអេស្ប៉ាញមួយនេះ បានត្រៀមទឹកប្រាក់ប្រមាណជា ១០,៦លានផោន ស្មើ ១២លានអឺរ៉ូ ដើម្បីនាំយកកីឡាករវ័យក្មេងនេះត្រឡប់មកវិញ។

លោក Robert Fernandez ប្រធានក្លិប Barcelona ពិតជាចង់បានកីឡាករ Gerard Deulofeu ត្រឡប់មកវិញខ្លាំងណាស់ លោកជឿជាក់ថា ក្រុម Everton នឹងយល់ព្រមលក់ កីឡាករវ័យក្មេងអេស្ប៉ាញរូបនេះត្រឡប់មកឲ្យ Barcelona វិញ ព្រោះថា Everton បានទិញយកកីឡាករនីហ្សេរីយ៉ា Onyekuru ក្នុងតម្លៃ ៧លានផោន រួចមកហើយ។ ដូច្នេះហើយ Barcelona មានសង្ឃឹមក្នុងការនាំយកខ្សែបម្រើស្លាប Gerard Deulofeu ត្រឡប់មកវិញក្នុងពេលឆាប់ៗនេះ។