កំពង់ធំៈ លោកប្រធានការិយាល័យចរាចរណ៍នៃស្នងការនគរបាលខេត្តកំពង់ធំ បានប្រាប់Post News ថា មានករណីគ្រោះថ្នាក់ចរាចរណ៍កើតឡើង រវាង រថយន្ត និងម៉ូតូក្នុងទិសដៅផ្ទុយគ្នា បណ្តាលឲ្យបុរសម្នាក់ស្លាប់។

ហេតុការណ៍បានកើតឡើងនៅវេលាម៉ោង៧ និង៥០នាទីល្ងាច ថ្ងៃទី២ ខែមិថុនា ឆ្នាំ២០១៧ នៅលើកំណាត់ផ្លូវជាតិលេខ៦ ភូមិបន្ទាយយមរាជ ឃុំប្រសាទ ស្រុកសន្ទុក ខេត្តកំពង់ធំ។

រថយន្តបង្កម៉ាក សាំងយ៉ុង ពណ៌ស ពាក់ស្លាកលេខ ភ្នំពេញ2AN-0544 អ្នកបើកបរមិនស្គាល់អត្តសញ្ញាណ(គេចខ្លួន) បានបុកម៉ូតូ ម៉ូតូម៉ាក ស៊ុយសាគីស្មាក់រីវូ ពណ៌ខ្មៅ ពាក់លេខភ្នំពេញ1HC-8716 ជិះដោយឈ្មោះ កៅ ប៉ូច ភេទប្រុស អាយុ៤៨ឆ្នាំ ស្នាក់នៅភូមិ ឃុំ កើតហេតុខាងលើ (ស្លាប់នៅកន្លែងកើតហេតុ)។

មូលហេតុជាបឋម បង្កឡើងដោយអ្នកបើកបរម៉ូតូ បើកបត់ឆ្វេងខ្ជីរខ្ជារខ្វះការប្រុងប្រយ័ត្ន រួមផ្សំនិងអ្នកបើកបររថយន្តមានល្បឿនលឿន ។

ករណីនេះ សមត្ថកិច្ចជំនាញកំពុងកសាងសំណុំរឿង និងប្រមូលវត្ថុតាងរក្សាទុកនៅអធិការដ្ឋាននគរបាលស្រុកសន្ទុក រង់ចាំការដោះស្រាយគ្នាពេលក្រោយ។ ចំណែកសាកសព ត្រូវបានសមត្ថកិច្ចប្រគល់ក្រុមគ្រួសារយកទៅធ្វើបុណ្យតាមប្រពៃណី៕