ពោធិ៍សាត់ៈ លោកអធិការស្រុកបាកាន បានប្រាប់Post Newsថា មានករណីគ្រោះថ្នាក់ចរាចរណ៍មួយបង្កឡើងដោយរថយន្តមួយគ្រឿងម៉ាកកាមរី បើកបរខ្វះការប្រុងប្រយត្ន័ បានជ្រុលល្បឿនទៅបុកជាមួយនឹងម៉ូតូម៉ាក ហុងដាសេ១២៥ ពណ៌ខ្មៅ ដែលកំពុងបើកបរដោយបុរសម្នាក់ ក្នុងទិសដៅបញ្ច្រាស់ទោសគ្នាពេញទំហឹង បណ្តាលឲ្យបុរសអ្នកបើកម៉ូតូប៉ើងដូចកណ្តូប ស្លាប់ភ្លាមៗនៅនឹងកន្លែងកើតហេតុ។

ហេតុការណ៍នេះបានកើតឡើងកាលពីវេលាម៉ោង១២និង៨នាទី ថ្ងៃត្រង់ទី២ ខែកក្កដា ឆ្នាំ២០១៧ ស្ថិតនៅចំណុចចន្លោះគីឡូម៉ែត្រលេខ២០០-២០១ តាមបណ្តោយផ្លូវជាតិលេខ៥ ក្នុងភូមិក្តីឈ្នួល ឃុំត្រពាំងជង ស្រុកបាកាន ខេត្តពោធិ៍សាត់។

សមត្ថកិច្ចបានឲ្យដឹងថា គ្រោះថ្នាក់ចរាចរណ៍នេះ បង្កឡើងដោយរថយន្តម៉ាកកាមរី ពណ៌ប្រផេះ ពាក់ផ្លាកលេខ ភ្នំពេញ 2K-4211 បើកបរក្នុងទិសដៅពីកើតទៅលិចលុះដល់ចំណុចកើតហេតុខាងលើ ក៏បានបុកជាមួយនឹងម៉ូតូម៉ាកហុងដាសេ១២៥ ស៊េរីឆ្នាំ២០១៥ ពណ៌ខ្មៅ ពាក់ស្លាកលេខ បាត់ដំបង 1I-9857 ដែលកំពុងបើកបរដោយបុរសម្នាក់ឈ្មោះ វិត វឿន ភេទប្រុស អាយុ២១ឆ្នាំ ស្នាក់នៅភូមិបឹងប្រិយ៍ ឃុំ ត្រពាំងជង ស្រុកបាកាន ដែលកំពុងបើកបរក្នុងទិសដៅពីលិចទៅកើត បណ្តាលឲ្យស្លាប់ភ្លាមៗនៅកន្លែងកើតហេតុតែម្តង។ ចំណែកអ្នកបើកបររថយន្តបង្កវិញ បានរត់គេចខ្លួនបាត់ស្រមោល បន្សល់ទុករថយន្តនៅនឹងកន្លែងកើតហេតុ។

ក្រោយកើតហេតុ សមត្ថកិច្ចបានចុះមកធ្វើការវាស់វែង នាំយករថយន្តនិងម៉ូតូខាងលើ យកទៅរក្សាទុកនៅការិយាល័យចរាចរណ៍ផ្លូវគោក ដើម្បីរង់ចាំធ្វើការដោះស្រាយគ្នាពេលក្រោយតាមផ្លូវច្បាប់បន្តទៀត។ ចំណែកសាកសពជនរងគ្រោះត្រូវបានសមត្ថកិច្ចប្រគល់ទៅឲ្យក្រុមគ្រួសារធ្វើបុណ្យតាមប្រពៃណី៕