ភ្នំពេញៈ ក្រុមអ្នកជួញដូរនិងប្រើប្រាស់គ្រឿងញៀនប្រុសស្រី១០នាក់ រួមនិងថ្នាំញៀនចំនួន៦កញ្ចប់ ត្រូវបានកម្លាំងនគរបាលព្រហ្មទណ្ឌខណ្ឌសែនសុខ ធ្វើការបង្ក្រាបបានបន្ទាប់ពីពួកគេទៅប្រមូលផ្តុំគ្នាក្នុងបន្ទប់ជួល។

ករណីបង្ក្រាបក្រុមជនសង្ស័យខាងលើនេះធ្វើឡើងកាលពីវេលាម៉ោង១១ ព្រឹកថ្ងៃទី៥ ខែកក្កដា ឆ្នាំ២០១៧ នៅចំណុចបន្ទប់ជួល សង្កាត់ទឹកល្អក់១ ខណ្ឌទួលគោក រាជធានីភ្នំពេញ។
លោក យឹម ដាវុធ នាយផ្នែកនគរបាលព្រហ្មទណ្ឌខណ្ឌសែនសុខ បានឲ្យដឹងថា មុនដំបូងគឺកម្លាំងសមត្ថកិច្ចបានធ្វើការល្បាតក្នុងមូលដ្ឋាន ហើយក៏ឃាត់ខ្លួនជនសង្ស័យម្នាក់ក្នុងចំណោម១០នាក់ នៅចំណុចផ្លូវ២៧១ សង្កាត់ទឹកថ្លា ដោយជនសង្ស័យមានឈ្មោះ យឹម សំបូ ភេទប្រុស អាយុ៤៧ឆ្នាំ ជិះម៉ូតូ១គ្រឿងម៉ាកស៊ុយស៊ីគី វីវ៉ា ពណ៌ខ្មៅ ពាក់ស្លាកលេខ ភ្នំពេញ1K-1772 ដោយមានការសង្ស័យក៏ឃាត់ឆែកឆេរកឃើញថ្នាំញៀន១កញ្ចប់។

លោក នាយផ្នែករូបនេះបន្តទៀតថា ក្រោយមកកម្លាំងសមត្ថកិច្ចបាននាំខ្លួនជនសង្ស័យទៅឆែកឆេរបន្ទប់ជួលដែលគេស្នាក់នៅសង្កត់ទឹកល្អក់១ ខណ្ឌទួលគោកហើយបានឃើញជនសង្ស័យប្រុសស្រីចំនួន៩ទៀតកំពុងប្រមូលផ្តុំគ្នាប្រើប្រាស់គ្រឿងញៀន ទើបឃាត់ខ្លួនបានទាំងអស់តែម្តង។
ក្នុងនោះវត្ថុតាងដែលចាប់យករួមមាន ម្សៅក្រាមថ្លាស ចំនួន៦កញ្ចប់ ជញ្ជើងថ្លឹង១ ,ម៉ូតូ១គ្រឿងម៉ាកស៊ុយស៊ិគីវីវ៉ា ពាក់ស្លាកលេខភ្នំពេញ1K-1772 និងសម្ភារៈសម្រាប់ប្រើប្រាស់មួយចំនួនទៀត។

បច្ចុប្បន្នជនសង្ស័យប្រុសស្រីទាំង១០នាក់រួមនិងវត្ថុតាង កំពុងឃាត់ខ្លួនធ្វើការសាកសួនៅអធិការដ្ឋាននគរបាលខណ្ឌសែនសុខចាត់ការតាមនិតិវិធី៕