កណ្តាល: កម្លាំងអាវុធហត្ថខេត្តកណ្តាលរយ:ពេល២ថ្ងៃជាប់គ្នានេះ បានបើកប្រតិបត្តិការបង្ក្រាបករណីជួញដូរគ្រឿងញៀននៅតាមបណ្តាស្រុកក្នុងខេត្តកណ្តាល និងបន្តមកកាន់ខណ្ឌទួលគោក រាជធានីភ្នំពេញដោយចាប់ខ្លួនជនសង្ស័យជាបន្តបន្ទាប់ចំនួន៨នាក់ ព្រមទាំងដកហូតបានថ្នាំញៀនប្រមាណ២០កញ្ចប់។

លោកឧត្តមសេនីយ៍ត្រី សំ តុលា មេបញ្ជាការកងរាជអាវុធហត្ថខេត្តកណ្តាលបានឲ្យដឹងថា រយ:ពេល២ថ្ងៃគឺថ្ងៃទី២៣-២៤ ខែឧសភា ឆ្នាំ២០១៦ កម្លាំងអាវុធហត្ថខេត្តកណ្តាលបានបង្ក្រាបករណីគ្រឿងញៀនចំនួន៣លើក។

ប្រតិបត្តិការបង្ក្រាបលើកទី១-នៅ ស្រុកស្អាង ការបង្ក្រាបបានធ្វើឡើងនៅវេលាម៉ោង១៤និង៣០នាទី ថ្ងៃទី២៣ ខែឧសភា ឆ្នាំ២០១៦ នៅចំណុចក្នុង ភូមិលេខ១ ឃុំស្វាយរលំ ដោយឃាត់ខ្លួនជនសង្ស័យនាក់៤នាក់ ដោយដកហូតសារធាតុញៀន (ម៉ាទឹកកក) ចំនួន៥ កញ្ចប់ធំ និង១កញ្ចប់តូច ឧបករណ៍ប្រើប្រាស់ សម្ភារ:វេចខ្ចប់មួយចំនួន។

ដោយមានចម្លើយសារភាពពីជនសង្ស័យនៅវេលាម៉ោង១៣និង៤៥នាទី ថ្ងៃទី២៤ ខែឧសភា ឆ្នាំ២០១៦ កម្លាំងបានធ្វើការពន្លាតដែនដី សហការជាមួយកម្លាំងអាវុធហត្ថរាជធានីភ្នំពេញ ក្រោមការសម្របសម្រួលពីលោកព្រះរាជអាជ្ញាអមសាលាដំបូងខេត្តកណ្តាល និងរាជធានីភ្នំពេញ កម្លាំងបានបង្ក្រាបករណីជួញដូរសារធាតុញៀន នៅចំណុចផ្លូវរថភ្លើង សង្កាត់បឹងកក់២ ខណ្ឌទួលគោក រាជធានីភ្នំពេញ។

សម្រាប់ប្រតិបត្តិការនេះ កម្លាំងអាវុធហត្ថបានឃាត់ខ្លួនជនសង្ស័យម្នាក់ ភេទស្រី អាយុ២០ឆ្នាំ មុខរបរមិនពិតប្រាកដ រស់នៅក្នុងភូមិ២៣ សង្កាត់បឹងកក់២ ខណ្ឌទួលគោកដោយដកហូតសារធាតុញៀនចំនួន២កញ្ចប់ធំ។

ប្រតិបត្តិការបង្ក្រាបលើកទី២ នៅស្រុកខ្សាច់កណ្តាល ប្រតិបត្តិការនេះ បានធ្វើឡើង នៅវេលាម៉ោង៣:៤០នាទី ថ្ងៃទី២៣ ខែឧសភា ឆ្នាំ២០១៦ នៅលើដងផ្លូវចំណុច ភូមិវិហាសួគ៍ជើង ឃុំវិហាសួគ៍ ស្រុកខ្សាច់កណ្តាល ដោយឃាត់ខ្លួនជនសង្ស័យ២នាក់ និងដកហូតថ្នាំញៀនចំនួន៥កញ្ចប់។

ប្រតិបត្តិការបង្ក្រាបលើកទី៣-សម្រាបស្រុកកណ្តាលស្ទឹង ប្រតិបត្តិការនេះ បានធ្វើឡើង នៅវេលាម៉ោង៧:៣០នាទី ថ្ងៃទី២៤ ខែឧសភា ឆ្នាំ២០១៦ នៅចំណុចភូមិកំពង់ទួល ឃុំអន្លង់រមៀត ដោយឃាត់ខ្លួនជនសង្ស័យម្នាក់ និងដកហូតថ្នាំញៀនចំនួន១០កព្ចាប់ ជញ្ជីងសំរាប់ថ្លឹងគ្រឿងញៀនចំនួន១កាំភ្លើងកែច្នៃប្រើខ្យល់០១ដើម ដែកឆាបចុងស្រួចចំនួន០១ដើម ដែកស្នរចុងស្រួច០១ដើម សម្ភារវេចខ្ចាប់ និងសំរាប់ប្រើប្រាស់មួយចំនួន។

មន្រ្តីអាវុធហត្ថខេត្តកណ្តាល បានបញ្ជាក់ថា ប្រតិបត្តិការទាំង៣លើកខាងលើនេះ បានធ្វើឡើងក្រោមការដឹកនាំបញ្ជាពីលោក សំ តុលា មេបញ្ជាការ និងចុះដឹកនាំអនុវត្តផ្ទាល់ដោយលោកមេបញ្ជាការរង ទូច អ៊ីណាន ដោយអនុវត្តតាមអនុសាសន៍របស់ នាយឧត្តមសេនីយ៍ សៅ សុខា មេបញ្ជាការកងរាជអាវុធហត្ថលើផ្ទៃប្រទេស និងលោល ម៉ៅ ភារុណ អភិបាលខេត្តកណ្តាល ព្រមទាំងមានការសហការនិងសម្របសម្រួលពីលោកព្រះរាជអាជ្ញា លឹម សុគន្ថាជំនាញកងរាជអាវុធហត្ថផ្ទៃប្រទេស និងកងរាជអាវុធហត្ថរាជធានីភ្នំពេញ យ៉ាងល្អទាន់ពេលវេលា។

បើតាមចម្លើយសារភាពរបស់ជនសង្ស័យថា ថ្នាំញៀនទាំងនោះពួកគេនាំយកពីភ្នំពេញទៅចែកចាយនៅទឹកដីខេត្តកណ្តាល។
ជនសង្ស័យទាំង៨នាក់ កំពុងសួរនាំ នៅទីបញ្ជាការដ្ឋានអាវុធហត្ថខេត្ត ដើម្បីកសាងសំណុំរឿងបញ្ជូនទៅតុលាការ ចាត់ការតាមនីតិវិធី៕